അബ്ദുല്ലാ ഖലീഫാ അല്‍ മാരി ദുബൈ പൊലീസിന്‍െറ പുതിയ മേധാവി

ദുബൈ: മേജര്‍ ജനറല്‍ അബ്ദുല്ലാ ഖലീഫാ അല്‍ മാരിയെ ദുബൈ പൊലീസിന്‍െറ പുതിയ കമാന്‍റര്‍ ഇന്‍ ചീഫ് ആയി യു.എ.ഇ വൈസ്പ്രസിഡന്‍റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന്‍ റാശിദ് ആല്‍ മക്തൂം പ്രഖ്യാപിച്ചു. ബ്രിഗേഡിയറായിരുന്ന അല്‍ മാരിക്ക് മേജര്‍ ജനറലാക്കി കഴിഞ്ഞ ദിവസം ശൈഖ് മുഹമ്മദ്  സ്ഥാനക്കയറ്റം നല്‍കിയിരുന്നു. അസാമാന്യ നേതൃപാടവവും  സുരക്ഷാ മേഖലയില്‍ മികച്ച അനുഭവജ്ഞാനവുമുള്ള വ്യക്തിത്വമാണ് അല്‍ മാരിയുടെതെന്ന് ശൈഖ് അഭിപ്രായപ്പെട്ടു.

ദുബൈ പൊലീസ് മേധാവിയായിരുന്ന മേജര്‍ ജനറല്‍ ഖമീസ് മതാര്‍ അല്‍ മസീന കഴിഞ്ഞ നവംബര്‍ 24ന് ഹൃദയാഘാതം മൂലം അന്തരിച്ചിരുന്നു. 2014 മുതല്‍  സുരക്ഷാ-അടിയന്തിര സേവന വിഭാഗം ഡെ. ഡയറക്ടറായി പ്രവര്‍ത്തിച്ചു വരികയാണ് 51കാരനായ മേജര്‍ ജനറല്‍ അല്‍ മാരി. ശൈഖ് മുഹമ്മദ് തന്നിലേല്‍പ്പിച്ച ഉത്തരവാദിത്വത്തിന് നന്ദി പറഞ്ഞ പുതിയ പൊലീസ് മേധാവി  പ്രതീക്ഷക്കൊത്തുയര്‍ന്ന് പ്രവര്‍ത്തിക്കുമെന്നും ലോകത്തെമ്പാടുമുള്ള പൊലീസ് സേനകള്‍ക്ക് മാതൃകയാവും വിധം ദുബൈ പൊലീസിനെ നിലനിര്‍ത്തുമെന്നും പ്രതികരിച്ചു.  

ഡെപ്യൂട്ടി ചെയര്‍മാന്‍ ലഫ്.ജനറല്‍ ദഹി ഖല്‍ഫാന്‍ തമീമിന്‍െറ മികച്ച പ്രവര്‍ത്തനം വഴി കൈവരിച്ച നേട്ടങ്ങള്‍ മുന്നോട്ടുകൊണ്ടുപോകുമെന്നും അദ്ദേഹം പറഞ്ഞു.