സ്കോട്ടിഷ് ക്രിമിനൽ സംഘത്തിലെ പ്രധാനിയെ പിടികൂടി ദുബൈ പൊലീസ്​

ദുബൈ: അന്തർദേശീയ ക്രിമിനൽ സംഘങ്ങൾക്കെതിരായ നടപടിയുടെ ഭാഗമായി ദുബൈ പൊലീസും യു.എ.ഇ ആഭ്യന്തര മന്ത്രാലയവും ചേർന്ന് സ്കോട്ടിഷ് ക്രിമിനൽ സംഘത്തിലെ പ്രധാനിയെ പിടികൂടി. കുപ്രസിദ്ധ കുറ്റകൃത്യ സംഘമായ ‘ലിയോൺസി’ലെ അംഗമാണ്​ പിടിയിലായത്​.

ഇൻറർപോൾ റെഡ് നോട്ടീസിനെ തുടർന്ന്​ ദുബൈ വിമാനത്താവളത്തിൽ വെച്ചാണ്​ അറസ്റ്റ്​ നടന്നത്​. ആഗോള തലത്തിൽ കള്ളപ്പണം വെളുപ്പിക്കലും മറ്റു സംഘടിത കുറ്റകൃത്യങ്ങളും നേരിടുന്ന നടപടിയുടെ ഭാഗമായാണ്​ നിർണായക നേട്ടം ദുബൈ പൊലീസ്​ കൈവരിച്ചിരിക്കുന്നത്​. ഇത് അന്താരാഷ്ട്ര സുരക്ഷ സഹകരണത്തിൽ യു.എ.ഇയുടെ ശക്തമായ പങ്ക് വീണ്ടും തെളിയിക്കുന്നതാണെന്ന്​ അധികൃതർ പ്രസ്താവനയിൽ പറഞ്ഞു.

‘ഓപറേഷൻ അർമോറം’ എന്ന അന്താരാഷ്ട്ര ഓപ്പറേഷന്റെ ഭാഗമായാണ്​ ഇന്‍റർപോൾ പ്രതിക്കെതിരെ റെഡ് നോട്ടീസ് പുറപ്പെടുവിച്ചത്​.സ്പാനിഷ്​ കുറ്റാന്വേഷണ സംവിധാനം നേതൃത്വം നൽകിയ ഓപറേഷനിലൂടെ വിവിധ രാജ്യങ്ങളിലായി 14 പേരെ പിടികൂടിയിട്ടുണ്ട്​. സംയുക്ത നടപടിയിൽ യൂറോപോൾ, യു.കെയിലെ നാഷണൽ ക്രൈം ഏജൻസി, യു.എസിലെ ഡ്രഗ്​ എൻഫോർഴ്​സ്​മെന്‍റ്​ അഡ്​മിനിസ്​ട്രേഷൻ തുടങ്ങിയ പ്രധാന ഏജൻസികളും പങ്കാളികളായി. നടപടിലയിലൂടെ കുറ്റകൃത്യ ശൃംഖലയിലെ അംഗങ്ങളെ കണ്ടെത്തുകയും പ്രവർത്തന ഘടന തകർക്കുകയും അനധികൃത സമ്പാദ്യങ്ങൾ പിടിച്ചെടുക്കുകയും ചെയ്തു.

അന്വേഷണത്തിൽ യൂറോപ്പ്, മിഡിൽ ഈസ്റ്റ്, ഏഷ്യ എന്നിവിടങ്ങളിൽ മയക്കുമരുന്ന് കടത്തും കള്ളപ്പണം വെളുപ്പിക്കലും ഈ സംഘം നടത്തിവന്നതായി കണ്ടെത്തി. ഷെൽ കമ്പനികളും സങ്കീർണമായ സാമ്പത്തിക ഇടപാടുകളും ഉപയോഗിച്ചായിരുന്നു അനധികൃത വരുമാനം മറച്ചുവച്ചിരുന്നതെന്നും കണ്ടെത്തുകയുണ്ടായി.