അ​ഞ്ചു​ദി​വ​സം: ദു​ബൈ​യി​ൽ 25 യാ​ച​ക​ർ പി​ടി​യി​ൽ

ദു​ബൈ: എമിറേറ്റിലെ വിവിധ പൊലീസ്​ സ്​റ്റേഷൻ പരിധികളിൽ നിന്നായി റമദാൻ ആരംഭിച്ച ശേഷം 25 യാചകർ പിടിയിലായി. വിവിധ സ്​റ്റേഷനുകളുമായി സഹകരിച്ച്​ ദുബൈ പൊലീസിലെ കുറ്റാന്വേഷണ വിഭാഗമാണ്​ ഇവരെ പിടികൂടിയത്​. വ്രതമാസത്തിൽ യാചകർക്കെതിരെ ശക്​തമായ നടപടി സ്വീകരിക്കുന്നതിന്‍റെ ഭാഗമായി ആരംഭിച്ച ‘ഭിക്ഷാടനം അനുകമ്പയുടെ തെറ്റായ ആശയമാണ്’ എന്ന തലക്കെട്ടിലെ കാമ്പയിന്‍റെ ഭാഗമായാണ്​ നടപടി സ്വീകരിച്ചത്​. മാർച്ച്​ 23 മുതൽ 27വരെ റമദാനിലെ ആദ്യ അഞ്ചുദിവസങ്ങളിലാണ്​ ഇത്രയും പേർ പിടിയിലായത്​.

ഭിക്ഷാടനത്തിനെതിരെ ശക്​തമായ നടപടി സ്വീകരിക്കുന്നതിന്‍റെ ഗുണഫലങ്ങൾ കാണുന്നുണ്ടെന്നും ഈ വർഷം ഇത്തരക്കാരുടെ സാന്നിധ്യം വളരെ കുറഞ്ഞതായും ദുബൈ പൊലീസ്​ മേജർ ജനറൽ സലീം അൽ ജല്ലാഫ്​ പറഞ്ഞു. ഈ വർഷം അറസ്റ്റിലായവരിൽ 13 പേർ സ്ത്രീകളും 12 പേർ പുരുഷന്മാരുമാണെന്നും ശക്​തമായ നടപടി തുടരു​മെന്നും അദ്ദേഹം കൂട്ടിച്ചേർത്തു.

റമദാനിൽ യാചനക്കെതിരെ രാജ്യത്താകമാനം ശക്​തമായ നടപടി സ്വീകരിക്കുമെന്ന മുന്നറിയിപ്പുമായി വിവിധ എമിറേറ്റുകളിലെ പൊലീസ് സേനകൾ നേരത്തെ രംഗത്തുവന്നിരുന്നു​. യാചനയിലൂടെ വലിയ തുക തന്നെ വ്യക്​തികളും ഗ്രൂപ്പുകളും ശേഖരിക്കുന്നതായി കണ്ടെത്തിയ സാഹചര്യത്തിലാണ്​ നടപടി കർശനമാക്കാൻ അധികൃതർ തീരുമാനിച്ചത്​. യാചകർക്ക്​ പണമോ സഹായമോ ചെയ്യരുതെന്ന്​ താമസക്കാരോടും പൊലീസ്​ അധികൃതർ ആവശ്യപ്പെട്ടിട്ടുണ്ട്​. സർക്കാറിൽ രജിസ്റ്റർ ചെയ്ത സംവിധാനങ്ങൾ വഴി മാത്രമായിരിക്കണം സംഭാവനകൾ നൽകേണ്ടതെന്നും നിർദേശിച്ചിട്ടുണ്ട്​.

യാചന നിയമപരമായി കുറ്റകൃത്യമായതിനാൽ ഒരുതരത്തിലും താമസക്കാർ ഇവ​രോട്​ ഇടപെടരുതെന്നും അധികൃതർ നിർദേശിച്ചു. കഴിഞ്ഞ വർഷം റമദാനിൽ 382 യാചകരും 222 വഴിയോര കച്ചവടക്കാരും ഉൾപ്പെടെ 604 പേരെ ദുബൈ പൊലീസ് അറസ്റ്റ് ചെയ്തിരുന്നു. 901 എന്ന കോൾ സെന്‍റർ വഴിയും ‘പൊലീസ് ഐ’ സേവനം വഴിയും ഇതുസംബന്ധിച്ച പരാതികൾ സ്വീകരിക്കുന്നുണ്ട്​​. ദുബൈ പൊലീസ്​, ഇസ്​ലാമിക് അഫയേഴ്‌സ് ആൻഡ് ചാരിറ്റബിൾ ആക്‌ടിവിറ്റീസ് ഡിപ്പാർട്മെൻറ്​, ദുബൈ ജനറൽ ഡയറക്ടറേറ്റ് ഓഫ് റസിഡൻസി ആൻഡ് ഫോറിനേഴ്‌സ് അഫയേഴ്‌സ്, ദുബൈ മുനിസിപ്പാലിറ്റി എന്നിവയുമായി സഹകരിച്ചാണ് ഇത്തവണ ഭിക്ഷാടനത്തിനെതിരെ​ കാമ്പയിൻ നടത്തുന്നത്​. ഷാർജയിലും അജ്​മാനിലും പൊലീസ്​ വകുപ്പുകൾ റമദാന്​ മുന്നോടിയായി കർശന നടപടികൾ ആരംഭിച്ചിട്ടുണ്ട്​.