വരും തലമുറയുടെ കരുത്തിനെ അടയാളപ്പെടുത്താൻ ശൈഖ്​ സുൽത്താൻ അവാർഡ്​

ദുബൈ: വളർന്നുവരുന്ന നാളെയുടെ നായികാനായകൻമാർക്ക്​ ​പ്രതിഭ തെളിയിക്കാൻ വേദിയൊരുക്കുന്ന ശൈഖ്​ സുൽത്താൻ അവാർഡ്​ സമിതി കോവിഡ്​ കാലത്ത്​ കുട്ടികളുടെയും യുവജനങ്ങളുടെയും ​പ്രതിഭക്ക്​ മാറ്റുകൂട്ടാൻ ഒരുക്കിയ ചലഞ്ച്​ യുവർസെൽഫ്​ മത്സരത്തിന്​ ഇൗ മാസം 18 വരെ അപേക്ഷിക്കാം. 13 മുതൽ 18 വയസു വരെ ​​പ്രായക്കാരായ ഏതു രാജ്യങ്ങളിൽ നിന്നുള്ളവർക്കും ഇതിൽ പ​െങ്കടുക്കാം. കലാപ്രവർത്തനങ്ങൾ, സംഗീതം, പാചക നൈപുണ്യം എന്നിവയേതെങ്കിലും വ്യക്​തമാക്കുന്ന 12 മിനിറ്റ്​ വീഡിയോയാണ്​ തയ്യാറാക്കേണ്ടത്​.

പ​െങ്കടുക്കുന്നവരുടെ പേര്​, വയസ്​, മത്സരത്തി​​െൻറ പേര്​, അവർ തിരഞ്ഞെടുത്ത മേഖല എന്നിവയും സമ​പ്രായക്കാരായ  കുട്ടികളെ പ്രചോദിപ്പിക്കാനുതകുന്ന സന്ദേശവും വീഡിയോയിൽ ഉൾക്കൊള്ളിക്കണം. ഇവ ഇൗ മാസം 18ന്​ മുൻപ്​ info@sheikhsultanaward.ae എന്ന വിലാസത്തിൽ അയക്കണം. അവാർഡ്​ കമ്മിറ്റിയുടെ സമൂഹ മാധ്യമ പ്ലാറ്റ്​​േഫാമുകളിൽ പോസ്​റ്റ്​ ചെയ്യുന്ന വീഡിയോ പൊതുജനങ്ങൾ വോട്ട്​ ചെയ്​താണ്​ വിജയികളെ കണ്ടെത്തുക.  ഒാരോ വിഭാഗത്തിലുമുള്ള വിജയികൾക്ക്​ മികവുറ്റ സമ്മാനങ്ങളും ലഭിക്കും. കോവിഡ്​ ലോക്​ഡൗൺ കാലത്തും പുതുതലമുറയുടെ ആവേശവും സർഗാത്​മകതയും ഒട്ടും കുറയാതെ നിലനിൽക്കുന്നു എന്നതി​​െൻറ അടയാളപ്പെടുത്തലാണ്​ മത്സരം. 

അറബ്​ ലോകത്തി​​െൻറ സാംസ്​കാരിക നായകനും ഷാർജ അന്താരാഷ്​ട്ര പുസ്​തകോത്സവം, ഷാർജ കുട്ടികളുടെ വായനോത്സവം, ഷാർജ ശിശു സൗഹൃദ ദേശം തുടങ്ങിയവയുടെയെല്ലാം ചാലകശക്​തിയുമായ ഷാർജ ഭരണാധികാരി ശൈഖ്​ ഡോ.സുൽത്താൻ മുഹമ്മദ്​ അൽ ഖാസിമി 2019ൽ ആരംഭിച്ച അവാർഡ്​ കൗമാരക്കാരുടെയും യുവജനങ്ങളുടെയും മാനസികവും ധൈഷണികവുമായ മുന്നേറ്റമാണ്​ ലക്ഷ്യമിടുന്നത്​. വിദ്യാർഥി-യുവജനങ്ങളിൽ മറഞ്ഞുകിടക്കുന്ന എല്ലാ കഴിവുകളും പൂർണമായി പ്രകടമാക്കുവാനും കൂടുതൽ മികവിലേക്ക്​ കുതിക്കാനും കരുത്തുപകരുന്ന വേദിയാണിതെന്ന്​ പ്രോജക്​ട്​ കോ ഒാർഡിനേറ്റർ ഹംദാ ബിൻ അൽ ശൈഖ്​ ഗൾഫ്​ മാധ്യമത്തോടു പറഞ്ഞു.  ഇന്നത്തെ ചെറു ​​​പ്രതിഭകൾ നാളെയുടെ ഭാവിയാണെന്നും അവരുടെ സന്നദ്ധ ​പ്രവർത്തനം മുതൽ കലാ സംഗീത വാസനയും സാഹസിക അഭിരുചികളും വരെ വ്യക്​തിത്വ വികസനത്തിന്​ വഴിയൊരുക്കുമെന്നും അവർ ചൂണ്ടിക്കാട്ടി.

ശൈഖ്​ സുൽത്താൻ മുഖ്യ അവാർഡിന്​ നവംബർ വരെയാണ്​ സമയം. 13-18 പ്രായക്കാർക്ക്​ വൈവിധ്യമാർന്ന മേഖലകളിൽ നിന്ന്​ അവർക്ക്​ ഇഷ്​ടമുള്ള രംഗം തിരഞ്ഞെടുത്ത്​ അവാർഡിന്​ അപേക്ഷിക്കാം. വോളണ്ടൻറിയിങ്​, അഡ്​വെഞ്ച്വർ, സ്​കിൽസ്​, ഫിസിക്കൽ ആക്​ടിവിറ്റി എന്നിങ്ങനെ നാല്​ വിഭാഗങ്ങളിലായാണ്​ മത്സരം. വിജയികൾക്ക്​ ഗോൾഡ്​, സിൽവർ, ബ്രോൺസ്​ മെഡലുകൾ നൽകും. ആശയ വിനിമയം, സഹകരണം, വിമർശന ബുദ്ധി, ക്രിയാത്​മകത എന്നിവയിലെല്ലാം മുന്നേറാൻ അവാർഡിലെ പങ്കാളിത്തം സഹായകമാകുമെന്ന്​ അവാർഡ്​ കമ്മിറ്റി കരുതുന്നു.  

പല കഴിവുകളും നിരന്തര പരി​ശ്രമങ്ങളിലൂടെയും ജീവിതാനുഭവങ്ങളിലൂടെയും സ്വായത്വമാക്കുന്നവയാണ്​. പലഘട്ടങ്ങളിൽ വന്നു ചേരാൻ സാധ്യതയുള്ള ​​​പ്രതിബന്ധങ്ങൾ തിരിച്ചറിയാനും അവയെ മറികടക്കാനുമുള്ള പ്രായോഗിക വഴികൾ കുട്ടികൾ പഠിക്കുന്നു. കുട്ടികളെയും യുവജനങ്ങളെയും കൂടുതൽ ശാക്​തീകരിക്കാനും ജീവിതത്തി​​െൻറ എല്ലാ മേഖലകളിലും വിജയികളാവാൻ പ്രാപ്​തരാക്കുവാനുമാണ്​ ശൈഖ്​ സുൽത്താൻ അവാർഡ്​ ലക്ഷ്യമിടുന്നത്​. ഇതു പോലുള്ള ​തയ്യാറെടുപ്പുകൾ മികച്ച പൗരൻമാരും നായകരുമായി കുട്ടികൾ വളർന്നു വരുന്നതിന്​ സഹായകമാകുമെന്ന്​ ഹംദാ ബിൻ അൽ ശൈഖ്​ ​​പ്രത്യാശ പ്രകടിപ്പിച്ചു.