രണ്ട്​ വർഷത്തിനിടെ ദുബൈ  നഗരസഭ തടഞ്ഞത്​ 60 കിംവദന്തികൾ

ദുബൈ: കഴിഞ്ഞ രണ്ട്​ വർഷത്തിനിടെ സാമൂഹിക മാധ്യമങ്ങളിൽ പടർന്ന 60 കിംവദന്തികൾ ദുബൈ നഗരസഭ തകർത്തു. പ്രചരണങ്ങൾ ശരിയോ തെറ്റോ എന്ന്​ പരിശോധിക്കാൻ ആരംഭിച്ച സംവിധാനം ഉപയോഗിച്ചാണ്​ ഇത്​ സാധിച്ചതെന്ന്​ ദുബൈ മുൻസിപ്പാലിറ്റി കസ്​റ്റമർ റിലേഷൻസ്​ ഡയറക്​ടർ ഖാദിർ ഹുസൈൻ അൽ നു​െഎമി പറഞ്ഞു. ‘കൺഫേംഡ്​ ന്യൂസ്​ സർവീസിന്​’ തുടക്കമിട്ട 2015 ജൂലൈ 23 മുതൽ 2016 തുടക്കം വരെ 15 പ്രചാരണങ്ങളാണ്​ പരിശോധിച്ചത്​. 2016 ൽ 28 എണ്ണവും ഇൗ വർഷം ഇതുവരെ 18 പ്രചാരണങ്ങളും തടഞ്ഞു. 

11 ാമത്​ ദുബൈ അന്താരാഷ്ട്ര ഭക്ഷ്യസുരക്ഷാ സമ്മേളനത്തിലെ ഭക്ഷ്യസുരക്ഷ, പോഷകാഹാര വെല്ലുവിളികൾ അഭിമുഖീകരിക്കുന്നതിൽ മാധ്യമങ്ങളുടെ പങ്ക്​ എന്ന സെമിനാറിൽ സംസാരിക്കവെയാണ്​ ​ ഇൗ കണക്കുകൾ അവതരിപ്പിക്കപ്പെട്ടത്​. പ്ലാസ്​റ്റിക്​ അരിയും പാൽക്കട്ടിയും മുതൽ വിവിധ പാനീയങ്ങളിൽ കാൻസർ ഉണ്ടാക്കുന്ന വസ്​തുക്കൾ ഉണ്ടെന്ന പ്രചാരണം വരെ ഉണ്ടായി.  മിക്ക കിംവദന്തികളും ഭക്ഷണവും കൺസ്യൂമർ ഉൽപന്നങ്ങളുമായി ബന്ധപ്പെട്ടവയായിരുന്നു. 
അടിസ്​ഥാനമില്ലാത്ത ഇത്തരം പ്രചാരണങ്ങൾ നടത്തുന്നതിൽ നിന്ന്​ ജനങ്ങൾ വിട്ടുനിൽക്കണമെന്നും അദ്ദേഹം ആവശ്യപ്പെട്ടു.

സാമൂഹിക മാധ്യമങ്ങളിൽ ആശയക്കുഴപ്പമുണ്ടാക്കുന്ന വിവരങ്ങൾ കണ്ടാൽ മുനിസിപ്പാലിറ്റിയിലെ കോൾ സ​െൻററിൽ ബന്ധപ്പെടാം.  ടോൾ ഫ്രീ ഹോട്ട്​ലൈൻ നമ്പറായ 800900 ൽ വിളിക്കുകയോ +971501077799 എന്ന നമ്പറിലേക്ക്​ വാട്​സാപ്പ്​ വഴി ബന്ധപ്പെടുകയോ ചെയ്യാം. ഇവിടെ നിന്ന്​ സന്ദേശത്തി​​െൻറ നിജസ്​ഥിതി മനസിലാക്കാൻ കഴിയും. എട്ട്​ മണിക്കൂറിനുള്ളിൽ ഇത്​ സംബന്ധിച്ച്​ വ്യക്​തത ഉണ്ടാകും. ഭക്ഷണത്തെക്കുറിച്ച്​  സാമൂഹിക മാധ്യമങ്ങളിലുണ്ടാകുന്ന വ്യാജ പ്രചാരണങ്ങൾ തടയാൻ മാധ്യമങ്ങളും ഭക്ഷ്യ റഗുലേറ്ററി അതോറിറ്റികളും പരിശ്രമിക്കണ​െമന്ന്​ സെമിനാറിൽ ആവശ്യമുയർന്നു. 
ഡോ. അൻവർ അൽ ഹമ്മദി അധ്യക്ഷത വഹിച്ചു.