ഉപയോഗിച്ച പാചക എണ്ണ ജൈവ ഡീസലാക്കാൻ പദ്ധതി; ദുബൈ മുനിസിപ്പാലിറ്റിയും ബയോഡ്​ ടെക്​നോളജിയും ധാരണയായി

ദുബൈ: അടുക്കളകളിലും റസ്റ്റാറന്‍റുകളിലും ഉപയോഗിച്ച പാചക എണ്ണകളും കൊഴുപ്പുകളും ഇനി സിങ്കിലൂടെ ഒഴുക്കിക്കളയണ്ട. ദുബൈ മുനിസിപ്പാലിറ്റിക്ക്​ നൽകിയാൽ അവരത്​ ശുദ്ധവും പുനരുപയോഗിക്കാവുന്നതുമായ ജൈവ ഡീസലാക്കി മാറ്റും. ഇതിനായി പരിസ്ഥിതി സൗഹൃദ പദ്ധതി പ്രഖ്യാപിച്ചിരിക്കുകയാണ്​ മുനിസിപ്പാലിറ്റി. ഡുബാൽ ഹോൾഡിങ്ങിന്‍റെ ഉപസ്ഥാപനമായ ബയോഡ്​ ടെക്​നോളജിയുമായി കൈകോർത്താണ്​ നൂതനമായ പദ്ധതി നടപ്പിലാക്കുക.

ഇതുസംബന്ധിച്ച ധാരണപത്രത്തിൽ ഇരുവരും കഴിഞ്ഞ ദിവസം ഒപ്പുവെച്ചു. ധാരണ പ്രകാരം ദുബൈയിലുടനീളുമുള്ള വീടുകളിൽ നിന്നും റസ്റ്റാറന്‍റുകളിൽ നിന്നും ഉപയോഗിച്ച പാചക എണ്ണകൾ, ഗ്രീസ്​, കൊഴുപ്പുകൾ എന്നിവ ശേഖരിച്ച്​ ബയോഡ്​ ടെക്​നോളജി പുനരുപയോഗിക്കാവുന്ന ജൈവ ഡീസലാക്കി മാറ്റും. ഉപയോഗിച്ച ശേഷമുള്ള പാചക എണ്ണകളും മറ്റും ശേഖരിക്കുന്നതിനായി എമിറേറ്റിലെ വീടുകളേയും റസ്​റ്റോറന്‍റുകളേയും ബന്ധിപ്പിച്ചുള്ള പുതിയ ശൃംഖലക്ക്​ തുടക്കമിടും. ബി100 എന്ന ജൈവ ഡീസലാണ് ബയോഡ്​​ ഉത്​പാദിപ്പിക്കുക. അന്തരീക്ഷത്തിൽ കാർബൺ ബഹിർഗമനം കുറക്കുന്നതിന്​ പദ്ധതി വലിയ സഹായകമാവും. പാചക വാതക എണ്ണ സിങ്ക്​വഴി ഒഴിക്കുന്നത്​ തടയുക മാത്രമല്ല, പരിസ്ഥിതിക്ക്​ ഹാനികരമാവുന്ന വസ്തുക്കളെ ഇല്ലാതാക്കാനും പദ്ധതിയിലൂടെ കഴിയും.

മുനിസിപ്പാലിറ്റിയുടെ ഓവുചാൽ, പുനരുപയോഗ ജല പദ്ധതികളുടെ വകുപ്പ്​ ഡയറക്ടർ ഫഹദ്​ അൽ അ​വദി, ബയോഡ്​ ടെക്​നോളജി ബോർഡ്​ അംഗം യൂസുഫ്​ ബസ്താകി, ബയോഡ്​ ടെക്​നോളജി സി.ഇ.ഒ ശിവ വിഗ്​ തുടങ്ങിയവരുടെ സാന്നിദ്ധ്യത്തിലാണ്​ ധാരണ പത്രം ഒപ്പിട്ടത്​. നൂതന സാ​​ങ്കേതിക വിദ്യയും വ്യവസായ വൈദഗ്​ധ്യവും പ്രയോജനപ്പെടുത്തിയാണ്​ ഉപയോഗിച്ച പാചക എണ്ണകളെ പുനരുപയോഗ ജൈവ ഡീസലാക്കി മാറ്റുന്നതെന്ന്​ ശിവ വിഗ്​ പറഞ്ഞു. യു.എ.ഇയുടെ ഹരിത സാമ്പത്തിക ലക്ഷ്യങ്ങളുമായി ചേർന്നു നിൽക്കുന്നതാണ്​ പദ്ധതിയെന്ന്​ ദുബൈ മുനിസിപ്പാലിറ്റി അധികൃതരും വ്യക്​തമാക്കി. പദ്ധതിയിലൂടെ പരിസ്ഥിതി ആഘാതം കുറക്കാനും വാണിജ്യ കിച്ചണുകൾക്കും റസ്റ്റാറന്‍റുകൾക്കും മലിന ജലം ശുദ്ധീകരിക്കുന്നതിനുള്ള ചെലവ്​ കുറക്കാനും സാധിക്കും.