ദുബൈയിലെ ആദ്യ കാല ഡോക്​ടർ മുഹമ്മദ്​ ശരീഫ്​ അൽ മുല്ല വിടവാങ്ങി

ദുബൈ: എമിറേറ്റിലെ ആരോഗ്യ പരിരക്ഷാ മേഖലയിലെ തുടക്കക്കാരിൽ ഒരാളായ ഡോ. മുഹമ്മദ്​ ശരീഫ്​ അൽ മുല്ല ഇനി ഒാർമ. 80 വയസു പിന്നിട്ട ഡോക്​ടർ ബുധനാഴ്​ച ലണ്ടനിലാണ്​ മരണപ്പെട്ടത്​. പതിറ്റാണ്ടുകൾക്ക്​ മുൻപ്​ അദ്ദേഹം  ഗോൾഡ്​ സൂഖിൽ മുഹമ്മദ്​  ശരീഫ്​ ഫാർമസി തുടങ്ങുന്ന കാലത്ത്​ ദുബൈയിൽ വളരെ ചുരുക്കം ഡോക്​ടർമാർ മാത്രമാണുണ്ടായിരുന്നത്​. 

ഫാർമസിസ്​റ്റ്​ ആയും ഡോക്​ടറായും നഴ്​സായും ജീവകാരുണ്യ പ്രവർത്തകനായും ഇദ്ദേഹത്തെ പഴയ തലമുറ ഒാർമിക്കുന്നു. രോഗികളെ ചികിത്സിക്കാനും ശു​ശ്രൂഷിക്കാനും ജീവിതം സമർപ്പിച്ച അദ്ദേഹം പകർച്ച വ്യാധി കാലങ്ങളിൽ വീടുകൾ കയറിയിറങ്ങി ജനങ്ങൾക്ക്​ പ്രതിരോധ കുത്തിവെപ്പുകൾ നൽകി വന്നു. കാൽ നടയായി രോഗികളെ സന്ദർശിച്ച ഡോക്​ടർ ഏതു പാതിരാത്രിയും ചികിത്സ തേടി വരുന്നവർക്കു മുന്നിൽ വാതിൽ തുറന്നിട്ടു. 

രാജ്യത്തി​​​െൻറ വിദൂര കോണുകളിലെ രോഗികൾക്കും ആശ്വാസവുമെത്തിച്ചു. നിരവധി പ്രവാസി^സ്വദേശി കുടുംബങ്ങൾക്ക്​ ആരോഗ്യകാര്യത്തിൽ അവസാന വാക്കായിരുന്നു ഡോ. അൽ മുല്ല. ജനങ്ങൾ തന്നിലർപ്പിച്ച വി​ശ്വാസവും ആരോഗ്യമേഖലയിലെ പ്രതിസന്ധികളും തിരിച്ചറിഞ്ഞ്​ കൂടുതൽ അറിവു നേടാനും ജനങ്ങൾക്ക്​ ഏറ്റവൂം മികച്ച ചികിത്സ നൽകാനും അദ്ദേഹം എന്നും ​ശ്രദ്ധ പുലർത്തിപ്പോന്നു.  ആറു മക്കളാണ്​ അദ്ദേഹത്തിന്​. എമിറേറ്റ്​സ്​ റെഡ്​ ക്രസൻറ്​ ഡയറക്​ടർ മുഹമ്മദ്​ അൽ സർഉൗനി മകളുടെ ഭർത്താവാണ്​.