ശമ്പളം നൽകാത്ത കേസുകൾ: അബൂദബി കോടതികൾ വിധിച്ചത്​  50 ലക്ഷം ദിർഹം വരെ പിഴ

അബൂദബി: അബൂദബി എമിറേറ്റിൽ തൊഴിൽ നിയമലംഘനം നടത്തിയ തൊഴിലുടമകൾക്കെതിരെ കർശനമായ നടപടികൾ സ്വീകരിച്ചതായി കോടതി അധികൃതർ വ്യക്​തമാക്കി. ശമ്പളം നൽകാത്ത ചില കേസുകളിൽ 50 ലക്ഷം ദിർഹം വരെ പിഴ ഇൗടാക്കിയതായി അബൂദബി നീതിന്യായ വകുപ്പിലെ മുതിർന്ന ഉദ്യോഗസ്​ഥൻ പറഞ്ഞു. ബുധനാഴ്​ച മാധ്യമപ്രവർത്തകരുമായി സംവദിക്കവേയാണ്​ കോടതി അധികൃതർ ഇക്കാര്യം വ്യക്​തമാക്കിയത്​. 2017 ജനുവരി മുതൽ 2018 മാർച്ച്​ വരെ ശമ്പളം നൽകാത്തതി​ന്​ എതിരെയുള്ള 22 കേസുകളാണ്​ കോടതികൾ കൈകാര്യം ചെയ്​തതെന്ന്​ പ്രോസിക്യൂഷൻ വകുപ്പ്​ ഡയറക്​ടർ ഹസ്സൻ മുഹമ്മദ്​ ആൽ ഹമ്മാദി അറിയിച്ചു. 2016ൽ പരിക്കുമായി ബന്ധപ്പെട്ട 90 കേസുകളുണ്ടായിരുന്നു. 2017ൽ ഇത്​ 48 ആയി കുറഞ്ഞു. എമിറേറ്റിലെ മൊബൈൽ കോടതികൾ ആയിരക്കണക്കിന്​ തൊഴിലാളികൾക്ക്​ ഉപകരിച്ചു. തൊഴിലാളികൾ കോടതി ഫീസ്​ അടക്കേണ്ടതില്ല.

 അവർ കോടതി ഫീസുകളെ കുറിച്ച്​ ആശങ്കപ്പെടേണ്ടതില്ല. തങ്ങള​ുടെ ​പ്രയാസങ്ങൾ കോടതിയെ അറിയിച്ചാൽ മാത്രം മതി. കഴിയുന്നത്ര വേഗത്തിൽ ​പരിഹാരം കാണും. 
2017 നവംബറിലാണ്​ എമിറേറ്റിൽ ഏകദിന കോടതികൾ ആരംഭിച്ചത്​. തൊഴിൽതർക്ക കേസുകളിൽ കാലതാമസമില്ലാതെ വിവിധ പറയാൻ വേണ്ടിയാണിത്​. 
20,000 ദിർഹം വരെയുള്ള നഷ്​ടപരിഹാരമാണ്​ ഏകദിന കോടതികൾ വഴി അവകാ​ശപ്പെടാൻ സാധിക്കുക. മൊബൈൽ കോടതികളിലും തൊഴിലാളികൾ താമസിക്കുന്ന മുസഫയിലെയും മഫ്​റഖിലെയും കോടതി ഒാഫിസുകളിലും ​സങ്കടം ബോധിപ്പിക്കാൻ സാധിമെന്നും ഹസ്സൻ മുഹമ്മദ്​ ആൽ ഹമ്മാദി വ്യക്​തമാക്കി.