നാല്​ മിനിറ്റിനുള്ളിൽ സേവനവുമായി ദുബൈ ആംബുലൻസ്​

ദുബൈ: സഹായാഭ്യർത്ഥന ലഭിച്ചാൽ നാല്​ മിനിറ്റിനകം സേവനം ലഭ്യമാക്കുന്ന പദ്ധതിയുമായി ദുബൈ കോർപറേഷൻ ഫോർ ആംബുലൻസ്​ സർവീസ്​ ( ഡി.സി.എ.എസ്​.). അടിയന്തര ഘട്ടങ്ങളിൽ സ്​മാർട്​ ഫോണിലെ ഒരു ബട്ടൻ അമർത്തിയാൽ സേവനം ലഭിക്കും. നിർമിത ബുദ്ധിശക്​തി ഉപയോഗിച്ചാണ്​ ഇൗ സംവിധാനം പ്രവർത്തിക്കുക. 

ദുബൈ നിവാസികളുടെയും സന്ദർശകരുടെയും ജീവൻ രക്ഷിക്കുന്നതിന്​ സമയം പ്രധാന ഘടകമായതിനാലാണ്​ ഇത്തരമൊരു പദ്ധതി നടപ്പാക്കുന്നതെന്ന്​ ഡി.സി.എ.എസ്​. എക്​സിക്യുട്ടീവ്​ ഡയറക്​ടർ ഖലീഫ അൽ ദറാഇ അറിയിച്ചു. നാല്​ മിനിറ്റിനുള്ളിൽ സേവനം ലഭ്യമാക്കുന്ന മറ്റൊരു പ്രസ്​ഥാനവുമില്ലെന്നും അവർ ചൂണ്ടിക്കാട്ടി. പാരാ മെഡിക്കൽ സംഘമായിരിക്കും ആദ്യം രോഗിയുടെ അടുത്തെത്തുക. ഇവർ മെഡിക്കൽ സംഘവുമായി ആശയ വിനിമയം നടത്തിയായിരിക്കും ചികിൽസ ലഭ്യമാക്കുക.