ദുബൈ-അൽ​െഎൻ റോഡ്​ വികസനം: പുതിയ പാലം തുറന്നു

ദുബൈ: ദുബൈ-അൽ ഐൻ റോഡ്​ വികസന പദ്ധതിയുടെ ഭാഗമായ നദ്​ അൽ ഷേബ ഇൻറർചേഞ്ചിലെ പുതിയ പാലം തുറന്നു. രണ്ടു ഭാഗത്തേക്കും ഇരട്ട ലൈനുകളുള്ള പാലം ഗതാഗതക്കുരുക്കുകൾ ഒഴിവാക്കാനും ട്രാഫിക്​ എളുപ്പമാക്കാനും സഹായിക്കും. 170 മീറ്റർ നീളമാണ്​ റോഡ്​ ഗതാഗത അതോറിറ്റി (ആർ.ടി.എ)യുടെ പുതിയ പാലത്തിനുള്ളത്​. പാലം തുറന്നതോടെ ദുബൈ-അൽ ഐൻ റോഡ്​ വികസന പദ്ധതി 70 ശതമാനം പൂർത്തിയായതായി ആർ.ടി.എ ഡയറക്​ടർ ജനറൽ മത്വാർ മുഹമ്മദ്​ അൽ തായർ പറഞ്ഞു.

പുതിയ റോഡ്​ നിലവിൽവന്നതോടെ ജങ്​ഷനിലെ യാത്രാസമയം 88 ശതമാനം കുറഞ്ഞ്​ 104 സെക്കൻഡിൽനിന്ന്​ 13 സെക്കൻഡാകും. രണ്ടു ഭാഗങ്ങളിലേക്കുമായി മണിക്കൂറിൽ 6600 വാഹനങ്ങളെ കടത്തിവിടാൻ പാലത്തിന്​ കഴിയും. റോഡ്​ പൂർത്തിയായാൽ മണിക്കൂറിൽ 12,000 വാഹനങ്ങൾ വരെ കടന്നുപോകാൻ സാധിക്കുമെന്നും അധികൃതർ അറിയിച്ചു. നദ്​ അൽ ഷേബ, മെയ്​ദൻ അടക്കം വിവിധ വികസന പദ്ധതികളുടെ വേഗം വർധിക്കാൻ വികസനം ഉപകരിക്കും.