ഒമ്പത്​ സെക്കൻഡിനകം എമിഗ്രേഷനുമായി ദുബൈ വിമാനത്താവളം

കണ്ണും മുഖവും ക്യാമറയിൽ കാണിച്ച്​ എമിഗ്രേഷൻ നടപടി പൂർത്തീകരിക്കാൻ സഹായിക്കുന്ന അത്യാധുനിക യാത്ര-സംവിധാനമാണ് ഫാസ്​ട്രാക്ക് ബയോമെട്രിക്

ദുബൈ: ദുബൈ എയർപോർട്ടിലെ ഫാസ്​റ്റ് ട്രാക്ക് ബയോമെട്രിക് പാസ്‌പോർട്ട് നിയന്ത്രണ സംവിധാനത്തിലുടെ യാത്രകാർക്ക് ഒമ്പത്​ സെക്കൻഡിനുള്ളിൽ നടപടിപൂർത്തിയാക്കാൻ കഴിയുമെന്ന് അധികൃതർ. എയർപോർട്ടിലെ ഡിപ്പാർച്ചർ, അറൈവൽ ഭാഗത്തുള്ള 122 സ്മാർട്ട്‌ ഗേറ്റുകളിൽ പുതിയ ബയോമെട്രിക് സംവിധാനം ലഭ്യമാക്കിയിട്ടുണ്ടെന്ന് ജി.ഡി.ആർ.എഫ്​.എ മേധാവി മേജർ ജനറൽ മുഹമ്മദ് അഹമ്മദ് അൽ മറി പറഞ്ഞു.

ദുബൈയിൽ നടക്കുന്ന എയർപോർട്ട് ഷോയിലെ എയർപോർട്ട് സെക്യൂരിറ്റി ഫോറത്തിൽ സംസാരിക്കുകയായിരുന്നു അദ്ദേഹം. കണ്ണും മുഖവും ക്യാമറയിൽ കാണിച്ച്​ എമിഗ്രേഷൻ നടപടി പൂർത്തീകരിക്കാൻ സഹായിക്കുന്ന അത്യാധുനിക യാത്ര-സംവിധാനമാണ് ഫാസ്​ട്രാക്ക് ബയോമെട്രിക്.

കോവിഡി​െൻറ പശ്ചാത്തലത്തിൽ എവിടെയും സ്പർശനം ഇല്ലാതെ നടപടി പൂർത്തിയാകാൻ സംവിധാനം സഹായിക്കും. ടെർമിനൽ 3- ബിസിനസ് ക്ലാസ്​ യാത്രക്കാരുടെ ഭാഗത്ത്‌ ഫെബ്രുവരി 22ന്​ തുടങ്ങിയ സംവിധാനമാണ്​ ഇപ്പോൾ കൂടുതൽ മേഖലകളിലേക്ക്​ വ്യാപിപ്പിച്ചത്​.