ദുബൈ-അബൂദബി അതിവേഗ ഇലക്​ട്രിക്​ ട്രെയിൻ വരുന്നു

ദുബൈ: ദുബൈ, അബൂദബി എമിറേറ്റുകളെ ബന്ധിപ്പിക്കുന്ന​ രാജ്യത്തെ ആദ്യ അതിവേഗ ഇലക്​ട്രിക്​ പാസഞ്ചർ ട്രെയിൻ പ്രഖ്യാപിച്ച്​ ഇത്തിഹാദ്​ റെയിൽ. വ്യാഴാഴ്ച അൽ ഫയാഹ്​ സ്​റ്റേഷനിൽ നടന്ന ചടങ്ങിൽ അബൂദബി കിരീടാവകാശിയും എക്സിക്യുട്ടീവ്​ കൗൺസിൽ ചെയർമാനുമായ ശൈഖ്​ ഖാലിദ്​ ബിൻ മുഹമ്മദ്​ ആൽ നഹ്​യാൻ, ദുബൈ ഭരണാധികാരിയും ഉപ പ്രധാനമന്ത്രിയും പ്രതിരോധ മന്ത്രിയും ദുബൈ എക്സിക്യുട്ടീവ്​ കൗൺസിൽ ചെയർമാനുമായ ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്​തൂം എന്നിവരുടെ സാന്നിധ്യത്തിൽ ഇത്തിഹാദ്​ റെയിൽ ആണ് പദ്ധതി പ്രഖ്യാപിച്ചത്​. വ്യാഴാഴ്ച അബൂദബി മീഡിയ ഓഫിസ്​ എക്സ്​ എകൗണ്ടിലൂടെയാണ്​​ ഇക്കാര്യം പുറത്തുവിട്ടത്​. പദ്ധതി പൂർത്തീകരിക്കുന്നതോടെ അര മണിക്കൂറിനുള്ളിൽ ദുബൈയിൽ നിന്ന്​ അബൂദബിയിലെത്താം. ​

അബൂദബി, ദുബൈ, ഷാർജ, ഫുജൈറ എമിറേറ്റുകളിലായി ആറ്​ സ്​റ്റേഷനുകളാണ് ഉണ്ടാവുക. റീം ഐലന്‍റ്​, സഅദിയാത്ത്​, യാസ്​ ​ഐലന്‍റ്​, അബൂബദി സായിദ്​ അന്താരാഷ്ട്ര വിമാനത്താവളം, ജബൽ അലിയിലെ ആൽ മക്​തൂം അന്താരാഷ്ട്ര വിമാനത്താവളം, ദുബൈയിലെ അൽ ജദ്ദാഫ്​ എന്നിവിടങ്ങളിലായിരിക്കും ​സ്​റ്റേഷനുകൾ. മെട്രോ, ബസ്​ ലൈനുകളുമായി ഈ സ്​റ്റേഷനുകളെ ബന്ധിപ്പിക്കും. ബിസിനസ്​ ക്ലാസ്​ ലോഞ്ചുകൾ, ഷോപ്പുകൾ, കുടുംബ സൗഹൃദമായ വിനോദങ്ങൾ എന്നിവും ഇതോടനുബന്ധിച്ച്​ സജ്ജമാക്കും. യു.എ.ഇയിലെ പ്രധാന സ്ഥലങ്ങളിലൂടെ കടന്നുപോകുന്ന ​ട്രെയ്​ൻ ഒമാൻ അതിർത്തിവരെ സഞ്ചരിക്കും. മെസീറയിലൂടെയും ലിവ മരുഭൂമിയിലൂടെയും കടന്നുപോകുന്ന ട്രെയ്​ൻ യാത്രക്കാർക്ക്​ മനോഹരമായ അനുഭവം സമ്മാനിക്കുതാകും.

ജി.സി.സി രാജ്യങ്ങളിൽ റെയിൽ പദ്ധതി പ്രവർത്തനം ആംഭിക്കുന്നതോടെ ഇത്തിഹാദ്​ ട്രെയ്​ൻ സർവിസ്​ ജി.സി.സിയിലുടനീളം വ്യാപിപ്പിക്കാനാണ്​ പദ്ധതി. മണിക്കൂറിൽ 350 കിലോമീറ്ററായിരിക്കും വേഗത.