മദ്യപിച്ച്​ വാഹനമോടിച്ചു; യുവാവിന്​ 25,000 ദിർഹം പിഴ

ദുബൈ: മദ്യപിച്ച്​ വാഹനമോടിച്ച്​ അപകടം വരുത്തിയ യുവാവിന്​​ ദുബൈ ക്രിമിനൽ കോടതി​ 25,000 ദിർഹം പിഴ ചുമത്തി. മൂന്നു മാസത്തേക്ക് ഇയാളുടെ​ ലൈസൻസ്​ റദ്ദാക്കുകയും ചെയ്തു. ഏഷ്യൻ വംശജനാണ്​ നടപടി നേരിട്ടത്​. അനുവദനീയമല്ലാത്ത സ്ഥലത്ത്​ വെച്ച്​ മദ്യം കഴിക്കുക, മദ്യപിച്ച്​ വാഹനമോടിക്കുക, പൊതുമുതൽ നശിപ്പിക്കുക തുടങ്ങി മൂന്നു കുറ്റങ്ങളാണ്​ ഇയാൾക്കെതിരെ പ്രോസിക്യൂഷൻ ചുമത്തിയിരുന്നത്​. മദ്യലഹരിയിൽ നിയന്ത്രണം നഷ്ടപ്പെട്ട വാഹനം റോഡിലെ ഇരുമ്പ്​ ബാരിക്കേടിൽ ഇടിച്ചാണ്​ നിന്നത്​. അറസ്റ്റിലായ പ്രതിയുടെ കുറ്റസമ്മതവും അപകട വിദഗ്​ധരുടെ റിപോർട്ടും പരിഗണിച്ചാണ്​ പ്രതിക്കെതിരെ കോടതി വിധി പറഞ്ഞത്​. കേസിന്‍റെ സാഹചര്യങ്ങളും പ്രതി കുറ്റസമ്മതം നടത്തിയതും ചൂണ്ടിക്കാട്ടി ജഡ്ജിമാർ ശിക്ഷയിൽ ഇളവ്​ നൽകുകയായിരുന്നു.