ലോകത്താദ്യമായി മാസപ്പിറവി നിരീക്ഷിക്കാൻ ഡ്രോണുകളെ രംഗത്തിറക്കി യു.എ.ഇ

ദുബൈ: റമദാൻ മാസപ്പിറവി നിരീക്ഷിക്കുന്നതിന്​ ഡ്രോണുകൾ ഉപയോഗിക്കുമെന്ന്​ അറിയിച്ച്​ യു.എ.ഇ. ലോകത്ത്​ ആദ്യമായാണ്​ ഇത്തരമൊരു സംവിധാനം മാസപ്പിറവി നിരീക്ഷണത്തിന്​ ഉപയോഗിക്കുന്നത്​. യു.എ.ഇ ഫത്​വ കൗൺസിലാണ്​ ഡ്രോണുകൾ ഉപയോഗപ്പെടുത്തുന്നത്​ സംബന്ധിച്ച്​ വെളിപ്പെടുത്തിയത്​. ഡ്രോണുകൾ നിർമ്മിത ബുദ്ധി സാങ്കതികവിദ്യ അടക്കമുള്ള സംവിധാനങ്ങൾ ഉൾപ്പെടുന്നതാണ്​.

നേരിട്ട്​ കാണുന്നതിന്‍റെ ഒരു വിപുലീകരണമാണ്​ ഡ്രോണുകൾ ഉപയോഗിച്ചുള്ള നിരീക്ഷണമെന്ന്​ ഫത്​വ കീൺസിൽ വിശദീകരിച്ചു. മാസപ്പിറവി ഉറപ്പിക്കാൻ നേരിട്ടുകാണണമെന്ന പ്രവാചക അധ്യാപനത്തിന്‍റെ അടിസ്ഥാനത്തിലുള്ള തത്വം ചൂണ്ടിക്കാണിച്ചാണ്​ ​ഇക്കാര്യം കൗൺസിൽ വിശദീകരിച്ചത്​.

നഗ്നനേത്രങ്ങൾ കൊണ്ടുള്ള നിരീക്ഷണത്തിനു പുറമെ, ചന്ദ്രക്കല ദർശനത്തിന്റെ കൃത്യത ഉറപ്പാക്കാൻ ഏറ്റവും മികച്ച നൂതന ഉപകരണങ്ങൾ രാജ്യത്തുടനീളം ജ്യോതിശാസ്ത്ര നിരീക്ഷണാലയങ്ങൾ ഉപയോഗപ്പെടുത്തുന്നുണ്ട്​. മാസപ്പിറവിയുടെ ചിത്രങ്ങൾ പകർത്താനും ശാസ്ത്രീയ സ്ഥിരീകരണത്തിനും ഈ ഉപകരണങ്ങൾ സഹായിക്കാറുണ്ട്​. ജ്യോതിശാസ്ത്ര കണക്കുകൾ അനുസരിച്ച്​ ചന്ദ്രപ്പിറ കാണുന്ന സമയം കൃത്യമായി മനസിലാക്കുകകയും യു.എ.ഇയുടെ അന്താരാഷ്ട്ര ജ്യോതിശാസ്ത്ര കേന്ദ്രം ചിത്രങ്ങൾ പകർത്തുകയും ചെയ്യാറുണ്ട്​.

മാസപ്പിറ കാണുന്നതിന്‍റെ കൃത്യതയും വിശ്വാസ്യതയും വർധിപ്പിക്കുന്നതിനായി ദേശീയ സ്ഥാപനങ്ങൾ, പ്രത്യേക ഗവേഷണ കേന്ദ്രങ്ങൾ, ജ്യോതിശാസ്ത്ര നിരീക്ഷണാലയങ്ങൾ എന്നിവയുമായി ഏകോപിപ്പിച്ചാണ് ഡ്രോൺ സംവിധാനം നടപ്പിലാക്കുന്നത്. ഭാവിയിൽ വിവിധ ലോക രാജ്യങ്ങളിൽ മാസപ്പിറവി കാണാനായി ഉപയോഗിക്കുന്ന സംവിധാനങ്ങളുടെ പട്ടികയിൽ ഡ്രോണുകൾ ഇടംപിടിക്കുമെന്നാണ്​ വിലയിരുത്തപ്പെടുന്നത്​.