ബോംബുകൾ നിർവീര്യമാക്കാനുള്ള ഡ്രോൺ തയ്യാറാക്കി ദുബൈ പൊലീസ്​ 

ദുബൈ: വിദൂരത്തു നിന്ന്​ നിയന്ത്രിച്ച്​ ബോംബുകൾ നിർവീര്യമാക്കാനുള്ള ഡ്രോൺ ദുബൈ പൊലീസ്​ വികസിപ്പിച്ചു. ​േലാകത്തു തന്നെ ആദ്യമായാണിത്​. 
ദുബൈ പൊലീസ്​ സ്​ഫോടക വസ്​തു സുരക്ഷാ വിഭാഗത്തിലെ ഫസ്​റ്റ്​ കോർപ്പറൽ ഹമദ്​ റാഷിദ്​ അൽ ഫലാസിയും ഫസ്​റ്റ്​ സർജൻ മുഹമ്മദ്​ സുലൈമാൻ അൽ ബലൂഷിയും ചേർന്നാണ്​ ഇവ തയ്യാറാക്കിയത്​. 

വാഹനങ്ങളെക്കാൾ വേഗത്തിൽ ജല പീരങ്കികളെത്തിച്ച്​ ബോംബ്​ നിർവീര്യമാക്കാനുള്ള സാധ്യത തേടി നടത്തിയ ഗവേഷണത്തിലാണ്​ ഡ്രോണുകളുടെ സാധ്യത പ്രയോജനപ്പെടുത്താൻ ആലോചിച്ചതെന്ന്​ അവർ പറഞ്ഞു. അടിയന്തിര ഇടപെടൽ ആവശ്യമുള്ള ടൈം ബോംബുകൾ നിർവീര്യമാക്കുന്ന പ്രവർത്തനങ്ങൾക്കും ഇവയെ കാര്യക്ഷമമായി ഉപയോഗപ്പെടുത്താം. ജനാല ചില്ലുകൾ തകർക്കാനും സ്​ഫോടക വസ്​തുക്കൾ തെരഞ്ഞ്​ കണ്ടെത്താനും സഹായകമാണ്​. ഇവയിൽ ഘടിപ്പിച്ചിരിക്കുന്ന കാമറ മുഖേനയാണ്​ ഒളിപ്പിച്ചു വെച്ചിരിക്കുന്ന ബോംബുകൾ കണ്ടെത്തുക.

ദുബൈ പൊലീസ്​ മേധാവി മേജർ ജനറൽ അബ്​ദുല്ലാ ഖലീഫ അൽ മറിയുടെ സാന്നിധ്യത്തിൽ ഇവയുടെ പരീക്ഷണം വിജയകരമായി നടത്തി. ശാസ്​ത്രീയവും സാ​േങ്കതികവുമായ മികവുള്ള അത്യാധുനിക സാധ്യതകൾ ഉപയോഗിക്കുന്നതിൽ ദുബൈ പൊലീസ്​ എന്നും മുന്നിലാണെന്ന്​ അദ്ദേഹം പറഞ്ഞു. ബോംബുകളുടെ വയറുകൾ മുറിച്ചു കളയുന്ന കത്രികയുടെ ആകൃതിയിലുള്ള ബോംബ്​ കട്ടർ , വെളിച്ചമില്ലാത്ത സ്​ഥലങ്ങളിൽ തിളങ്ങുന്ന ലൈറ്റ്​ ഗ്ലൗ, ബോംബുകൾ നശിപ്പിക്കുന്നതിനായി ജനാല ചില്ലുകൾ തകർക്കുന്നതിന്​ ഗ്ലാസ്​ ബ്രേക്കർ, കാർ ബോംബുകളുൾപ്പെടെ നിർവീര്യമാക്കാൻ ഉപയോഗിക്കാവുന്ന വാട്ടർബോട്ടിൽ തുടങ്ങിയ ഉപകരണങ്ങൾ നേരത്തേ വികസിപ്പിച്ച സർജൻറ്​ ബലൂഷി സാമ്പത്തിക മന്ത്രാലയം മുൻപാകെ അഞ്ച്​ പേറ്റൻറ്​ അപേക്ഷകളും സമർപ്പിച്ചിട്ടുണ്ട്​.  .