അബൂദബി യാസ്​ ഐലന്‍റിൽ ഡ്രൈവറില്ലാ ടാക്സി സർവിസ്​

അബൂദബി: സുസ്ഥിര ഗതാഗത സംവിധാനങ്ങൾ എമിറേറ്റിലുടനീളും നടപ്പിലാക്കുന്നതിന്‍റെ ഭാഗമായി യാസ്​ ഐലന്‍റിലേക്ക്​ ഡ്രൈവറില്ലാ ടാക്സി സേവനം വ്യാപിപ്പിച്ച്​ അബൂദബി സംയോജിത ഗതാഗത കേന്ദ്രം. സ്മാർട്ട്​ ആൻഡ്​​ ഓട്ടോണമസ്​ സിസ്റ്റം കൗൺസിലിന്‍റെ മേൽനോട്ടത്തിൽ ലെവൽ 4 ഡ്രൈവറില്ലാ ടാക്സികളുടെ സേവനമാണ്​ ആരംഭിച്ചത്​​. സ്വയം നിയന്ത്രണ ഗതാഗതം സാധ്യമാക്കുന്ന പ്രാദേശിക ഓപ്പറേറായ ഓട്ടോഗോ,​ അന്താരാഷ്ട്ര കമ്പനിയായ ബൈഡുവിന്‍റെ അനുബന്ധ സ്ഥാപനമായ അപ്പോളോ ഗോ എന്നിവരുമായി സഹകരിച്ചാണ്​ പദ്ധതി വ്യാപിപ്പിച്ചത്​. എമിറേറ്റിലുടനീളം സുസ്ഥിര ഗതാഗത സംവിധാനങ്ങൾ നടപ്പിലാക്കുകയെന്ന നയത്തിന്‍റെ ഭാഗമായാണ്​ പുതിയ വിപുലീകരണമെന്ന്​ അബൂദബി മുനിസിപ്പാലിറ്റീസ്​ ഡിപാർട്ട്​മെന്‍റ്​ അറിയിച്ചു.

അടുത്ത ഘട്ടം അൽ റീം ഐലന്‍റ്​, അൽ മറിയ ഐലന്‍റ്​, അൽ സാദിയാത്ത്​ ഐലന്‍റ്​ എന്നിവിടങ്ങളിലേക്കും വ്യാപിപ്പിക്കാനാണ്​ പദ്ധതിയെന്നും അധികൃതർ അറിയിച്ചു. ഓട്ടോഗോയുടെ മൊബൈൽ ആപ്പ്​ വഴി യാത്രക്കാർക്ക്​ യാത്ര ബുക്ക്​ ചെയ്യാം. ആൻഡ്രോയിഡിലും ആപ്പിൾ ആപ്പ്​ സ്​റ്റോറിലും ഓട്ടോഗോ​ ലഭ്യമാണ്​. സുരക്ഷ പൂർണമായും ഉറപ്പുവരുത്തിയായിരുന്നു പരീക്ഷണം. പ്രമുഖ യു.എസ്​ കമ്പനിയായ ടെസ്​ല ഇക്കഴിഞ്ഞ ഫെബ്രുവരി 26 മുതൽ സ്വയം നിയന്ത്രണ വാഹനങ്ങളുടെ പരീക്ഷണ ഓട്ടത്തിന്​ അബൂദബിയിൽ തുടക്കമിട്ടിരുന്നു. ആദ്യ ഘട്ടത്തിൽ ഡ്രൈവറെ ഉൾപ്പെടുത്തിയുള്ള പരീക്ഷണ ഓട്ടമാണ്​ അവർ സംഘടിപ്പിച്ചത്​. സുരക്ഷയും പ്രവർത്തന സന്നദ്ധതയും ഉറപ്പുവരുത്തുന്നതിനായി രൂപകൽപന ചെയ്ത പദ്ധതിയിലൂടെയാണ്​ ഇത്​ നടപ്പിലാക്കിയത്​.

യു.എ.ഇ കാബിനറ്റിന്‍റെ ജനറൽ സെക്രട്ടേറിയറ്റിലെ ലജി​സ്​ലേഷൻ ലാബുമായി ഏകോപിപ്പിച്ചാണ്​ പരീക്ഷണം നടത്തുന്നത്​. അബൂദബിയുടെ സ്മാര്‍ട്ട്, സുസ്ഥിര മൊബിലിറ്റി മേഖയെ നിയന്ത്രിക്കുന്നതിനും വികസിപ്പിക്കുന്നതിനുമുള്ള സംയോജിത ഗതാഗത കേന്ദ്രത്തിന്റെ ശ്രമങ്ങളിലെ നിര്‍ണായക ചുവടു​വെപ്പാണിത്​​.