ഡോ. സഫിയ ബാവുണ്ണി നാട്ടില്‍ നിര്യാതയായി

ഷാര്‍ജ: ഷാര്‍ജയിലെ അറിയപ്പെടുന്ന അധ്യാപികയും പ്രഭാഷകയുമായ മലപ്പുറം എടപ്പാള്‍ കാടഞ്ചേരി കറുത്തേടത്ത് പറമ്പില്‍ ഡോ. സഫിയ ബാവുണ്ണി (54)  നാട്ടില്‍ നിര്യാതയായി. വെള്ളിയാഴ്ച ആശുപത്രിയിലായിരുന്നു മരണം.  പ്രീഡിഗ്രിക്ക് പഠിക്കുമ്പോൾ വിവാഹത്തെതുടർന്ന്​ പഠനം മുടങ്ങിയ അവർ  ഭര്‍ത്താവ്​ സൈതലവി മൗലവിക്കൊപ്പം പ്രവാസ ഭൂമിയിലെത്തി പഠനം തുടരുകയായിരുന്നു. കുറഞ്ഞ കാലങ്ങള്‍ക്കുള്ളില്‍ ഒട്ടേറെ ബിരുദങ്ങളാണ് ഈ മലയാളി വീട്ടമ്മ സ്വന്തമാക്കിയത്. ആദ്യം അഫ്ദലുല്‍ ഉലമ പൂർത്തിയാക്കി. ബി.എ ഓണേഴ്സ് നേടിയ ശേഷം അമേരിക്കയിലെ പ്രസ്​റ്റണ്‍ സർവകലാശാലയുടെ അജ്മാന്‍ സ​െൻററില്‍ നിന്ന് ബി.എ.ഐ.എസ്, അണ്ണാമലൈ സർവകലാശാലയിൽ  നിന്ന്  ലോക ചരിത്രത്തില്‍ എം.എ, ബി.എഡ്, പിന്നീട്  പ്രസ്​റ്റണിൽ നിന്ന് പി.എച്ച്.ഡി തുടങ്ങി സഫിയ നേടിയെടുത്തു. 

ഷാര്‍ജയിൽ ഡല്‍ഹി പ്രൈവറ്റ് സ്കൂളില്‍  ഡാറ്റ എന്‍ട്രി ഓപറേറ്റര്‍ തസ്തികയിൽ ജോലിക്ക്​ കയറിയ അവർ 2001ല്‍ അധ്യാപികയായി. 2006 മുതല്‍ ദുബൈ മെഡിക്കല്‍ കോളജില്‍ ഇസ്​ലാമിക് ഫിഖ്ഹില്‍ വിസിറ്റിങ് അധ്യാപികയായിരുന്നു. ശൈഖ് ഖലീഫ അവാര്‍ഡിനായി പരിഗണിക്കപ്പെട്ടവരുടെ പട്ടികയില്‍ രണ്ട് തവണ ഇവരുടെ പേരും ഉള്‍പ്പെട്ടിരുന്നു. മക്കള്‍: സമീര്‍, ഷഫീഖ് (യു.എ.ഇ വിദ്യഭ്യാസ മന്ത്രാലയം), സമീഹ (മാധ്യമ പ്രവര്‍ത്തക), ഷമീല, ഷഹീറ, മരുമക്കള്‍: ജാസ്മീന്‍, ആബിദ്, ഹസന്‍. ഖബറടക്കം ശനിയാഴ്ച രാവിലെ 11 മണിക്ക് കാടഞ്ചേരി ജമാമസ്ജീദ് ഖബര്‍സ്ഥാനില്‍ നടക്കും.