ഡോ. ഷംഷീർ വയലിൽ അമാനത്ത് ഹോൾഡിങ്സ്​ വൈസ് ചെയർമാൻ

ദുബൈ: ആരോഗ്യ, വിദ്യാഭ്യാസ മേഖലകൾ കേന്ദ്രീകരിച്ച്​ നിക്ഷേപങ്ങൾ നടത്തുന്ന യു.എ.ഇയിലെ ഏറ്റവും വലിയ ലിസ്​റ്റഡ് കമ്പനിയായ അമാനത്ത് ഹോൾഡിങ്സ്​​ വൈസ് ചെയർമാൻ ആൻഡ്​ മാനേജിങ്​ ഡയറക്ടറായി യുവ സംരംഭകൻ ഡോ. ഷംഷീർ വയലിലിനെ വീണ്ടും തെരഞ്ഞെടുത്തു. വി.പി.എസ് ഹെൽത്ത്കെയർ ചെയർമാനും മാനേജിങ്​ ഡയറക്ടറുമാണ്. 2.5 ബില്യൺ നിക്ഷേപക മൂലധനമുള്ള അമാനത്ത് ഹോൾഡിങ്സ്​ വൈസ് ചെയർമാനായി 2017ലാണ് ഷംഷീർ വയലിൽ ആദ്യം നിയമിതനായത്. ആരോഗ്യ മേഖലയിലെ അനുഭവ സമ്പത്ത് മുതൽക്കൂട്ടാക്കിയുള്ള സുപ്രധാന സംഭാവനകൾ പരിഗണിച്ചുകൂടിയാണ് ഡോ. ഷംഷീറിനെ പദവിയിലേക്ക് വീണ്ടും തിരഞ്ഞെടുത്തുകൊണ്ടുള്ള അമാനത്ത് ഹോൾഡിങ്സ്​ ഡയറക്ടർ ബോർഡ് തീരുമാനം.