ഏപ്രിൽ ഫൂൾ ആക്കേണ്ട; അഴിക്കുള്ളിലാകും

ഷാർജ: ഏപ്രിൽ ഫൂളിന്‍റെ ഭാഗമായിട്ടാണെങ്കിലും സമൂഹ മാധ്യമ പ്ലാറ്റ്​ഫോമുകളിൽ തെറ്റായ വിവരങ്ങൾ പങ്കുവെച്ചാൽ കനത്ത പിഴയും ജയിൽ ശിക്ഷയും നേരിടേണ്ടി വരുമെന്ന മുന്നറിയിപ്പുമായി ഷാർജ പബ്ലിക്​ പ്രോസിക്യൂഷൻ. നർമത്തിനായി പങ്കിടുന്ന തെറ്റായ വിവരങ്ങളും ദോഷം വരുത്തുന്ന ഉള്ളടക്കവും തമ്മിൽ യു.എ.ഇ നിയമം അനുസരിച്ച്​ പ്രത്യേക വേർതിരിവ് ഉണ്ടാവില്ലെന്നും രണ്ടും ക്രിമിനൽ കുറ്റകൃത്യമായാണ്​ പരിഗണിക്കുകയെന്നും അധികൃതർ വ്യക്​തമാക്കി.

ഏപ്രിൽ ഫൂൾ ദിനത്തിൽ കബളിപ്പിക്കുന്ന ഉള്ളടക്കങ്ങൾ വ്യാപകമായി സമൂഹ മാധ്യമങ്ങളിൽ പ്രചരിക്കാറുണ്ട്​. അത്തരം നടപടികൾ ചിലപ്പോഴെങ്കിലും നിയമപരമായ അതിർത്തികൾ ലംഘിക്കുന്ന തരത്തിലാവുന്ന സാഹചര്യത്തിലാണ്​ അധികൃതരുടെ ശക്​തമായ മുന്നറിയിപ്പ്​. യു.എ.ഇയിലെ നിയമം അനുസരിച്ച്​ ഇത്തരം നടപടികൾക്ക്​ ചുരുങ്ങിയത്​ ഒരു വർഷം വരെ തടവും ഒരു ലക്ഷം ദിർഹം പിഴയുമാണ്​ ശിക്ഷ. പൊതുജനാഭിപ്രായം തേടൽ, പൊതുജനങ്ങളെ ശല്യപ്പെടുത്തൽ, ഭീതി പരത്തൽ, പൊതുതാൽപര്യങ്ങൾക്ക്​ ഹാനികരമാവൽ, സാമ്പത്തിക, പൊതുക്രമത്തിനും പൊതുജനാരോഗ്യത്തിനും ഭീഷണിയാകൽ തുടങ്ങിയ ഉള്ളടക്കങ്ങൾക്ക്​ നിയമം ബാധകമാണ്​.

പങ്കുവെക്കപ്പെടുന്ന ഉള്ളടക്കങ്ങളുടെ ഉദ്ദേശ്യം ന്യായീകരിക്കാനുള്ള അവസരമാവില്ലെന്നും തമാശക്കാണേലും തെറ്റായ ഉള്ളടക്കങ്ങൾ പങ്കുവെക്കുന്നത്​ നിയമപരമായ പരിതിയിലുള്ളതായിരിക്കും. രാജ്യത്തെ അതോറിറ്റികൾക്കും സ്ഥാപനങ്ങൾക്കും എതിരായ പരമാർശങ്ങൾ അടങ്ങിയ ഉള്ളടക്കങ്ങളാണെങ്കിൽ പിഴ വർധിക്കും. രണ്ട്​ വർഷം തടവും രണ്ട്​ ലക്ഷം ദിർഹം പിഴയുമാണ്​ ഇത്തരം കുറ്റകൃത്യങ്ങൾക്കുള്ള ശിക്ഷ.