സിഗററ്റ്​ കുറ്റികൾ നീക്കം ചെയ്യാൻ 40 അത്യാധുനിക ഉപകരണങ്ങളുമായി ദുബൈ നഗരസഭ

ദുബൈ: റോഡുകളിൽനിന്നും ചന്തകളിൽനിന്നും സിഗററ്റ്​ കുറ്റികളും ചെറിയ മാലിന്യവും നീക്കം ചെയ്യാൻ ദുബൈ നഗരസഭ 40 അത്യാധുനിക ഉപകരണം സജ്ജീകരിച്ചു.
സന്തോഷകരവും സുസ്​ഥിരവുമായ നഗരം സൃഷ്​ടിക്കുകയെന്ന ദുബൈ നഗരസഭയുടെ ലക്ഷ്യം സാക്ഷാത്​കരിക്കുന്നതിന്​ ഉന്നത ഗുണനിലവാരമുള്ള 24 മണിക്കൂർ സേവനം ഇൗ ഉപകരണങ്ങൾ വഴി ലഭ്യമാകുമെന്ന്​ മാലിന്യ കൈകാര്യ വകുപ്പ്​ ഡയറക്​ടർ അബ്​ദുൽ മജീദ്​ സിഫാഇ അറിയിച്ചു.
നീക്കം ചെയ്യാൻ പ്രയാസമുള്ള ചെറിയ മാലിന്യം ഒഴിവാക്കുന്നതിനാണ്​ ഇൗ ഉപകരണം. 120 ലിറ്റർ ശേഷിയുള്ള ഉപകരണത്തിന്​ മണ്ണും ​െപാടിയും ഒരു സഞ്ചിയിലും സിഗററ്റ്​ കുറ്റികൾ മറ്റൊരു ബാഗിലുമായി സൂക്ഷിക്കാൻ കഴിയും.
 ഉപയോഗിക്കാനും കൊണ്ടുപോകാനും എളുപ്പമുള്ളതാണ്​ ഉപകരണം. തൊഴിലാളികൾക്ക്​ എല്ലാ സമയത്തും ഇത്​ ഉപയോഗിക്കാൻ സാധിക്കുകയും സമയവും അധ്വാനവും ലാഭിക്കാനാവുകയും ചെയ്യുമെന്നും അബ്​ദുൽ മജീദ്​ സിഫാഇ വ്യക്​തമാക്കി.