ഐ.എൻ.എൽ ഗൾഫ്​ ഘടകത്തിൽ ഭിന്നത; ഒരു വിഭാഗം സമാന്തര സംഘടനയുണ്ടാക്കുന്നു

ദുബൈ: ഐ.എൻ.എല്ലി​െൻറ ഗൾഫ്​ ഘടകമായ ഐ.എം.സി.സിയിലെ ഒരു വിഭാഗം പാർട്ടിവിട്ട്​ പുതിയ കൂട്ടായ്​മയുണ്ടാക്കാൻ ഒരുങ്ങുന്നു. യു.എ.ഇ ഘടകം തെരഞ്ഞെടുപ്പുമായി ബന്ധപ്പെട്ട്​ ഉയർന്ന തർക്കത്തെ തുടർന്നാണ്​ വിവിധ ഗൾഫ്​ രാജ്യങ്ങളിലെ ഭാരവാഹികളടക്കം കൂടിയാലോചിച്ച്​ പുതിയ സംഘടനക്ക്​ ശ്രമിക്കുന്നത്​. യു.എ.ഇ ഘടകം തെരഞ്ഞെടുപ്പിൽ വഹാബ്​​ പക്ഷക്കാരായ നേതാക്കളെ തഴഞ്ഞ്​ കാസിം പക്ഷക്കാരനായ ആളെ പ്രസിഡൻറാക്കിയതാണ്​ പ്രശ്​നത്തിന്​ കാരണമായതെന്ന്​ പാർട്ടി വിടാനൊരുങ്ങുന്ന നേതാക്കളുമായി ബന്ധപ്പെട്ട വൃത്തങ്ങൾ പറയുന്നു. ഇവർ ഐ.എൻ.എൽ സ്ഥാപക നേതാവ് ഇബ്രാഹിം സുലൈമാന്‍ സേട്ടി​െൻറ പേരില്‍ സാംസ്​കാരിക കേന്ദ്രം രൂപവത്​കരിച്ച് പ്രവർത്തിക്കാന്‍ തീരുമാനിച്ചതായി​ ബന്ധപ്പെട്ടവർ അറിയിച്ചു​.

ഐ.എൻ.എല്ലിലെ ഔദ്യോഗികവിഭാഗം തങ്ങളെ പൂർണമായി തള്ളിക്കളഞ്ഞെന്നാണ് ഇടഞ്ഞുനിൽക്കുന്ന ഐ.എം.സി.സി നേതൃത്വം ആരോപിക്കുന്നത്. എ.പി അബ്​ദുൽ വഹാബിനെതിരെ സംസ്ഥാനസമിതി യോഗത്തിൽ ചിലർ മുദ്രാവാക്യം വിളിച്ചപ്പോൾ പിന്തുണച്ചയാളാണ്​ യു.എ.ഇയിലെ പുതിയ പ്രസിഡ​െൻറന്നും വിഭാഗീയ പ്രവർത്തനം നടത്തിയയാളെ ​നേതൃത്വത്തിൽ അംഗീകരിക്കില്ലെന്നും ഇവർ ചൂണ്ടിക്കാണിക്കുന്നു. ഐ.എൻ.എൽ സംസ്ഥാന കമ്മിറ്റിയിലെ കാസിം പക്ഷക്കാരനായ എം.എ. ലത്തീഫ് നേരിട്ട് ദുബൈയിൽ എത്തി തെരഞ്ഞെടുപ്പിന്​ നേതൃത്വം നൽകിയത്​ വഹാബ്​ പക്ഷത്തെ പുറന്തള്ളാനാണെന്നും ആരോപിക്കുന്നു​. അതേസമയം, കൃത്യമായ നടപടിക്രമങ്ങൾ പാലിച്ചാണ്​ തെരഞ്ഞെടുപ്പ്​ നടന്നതെന്നും പാർട്ടിയുടെ വളർച്ചയിൽ അസൂയപൂണ്ടവരാണ്​ വിഭാഗീയതക്ക്​ ശ്രമിക്കുന്നതെന്നും മറുവിഭാഗം ചൂണ്ടിക്കാട്ടുന്നു. ​പാർട്ടിയിൽ നിലവിൽ പ്രശ്​നങ്ങളില്ലെന്നും യു.എ.ഇ ഘടകത്തിലെ മിക്ക ഭാരവാഹികളും ഐകകണ്​ഠ്യേനയാണ്​ തെരഞ്ഞെടുക്കപ്പെട്ടതെന്നും ഇവർ വ്യക്തമാക്കി.

കഴിഞ്ഞ വർഷം പിരിച്ചുവിട്ട ഐ.എം.സി.സി ജി.സി.സി കമ്മിറ്റി ചെയർമാൻ സത്താർ കുന്നില്‍, ട്രഷറർ ഷാഹുല്‍ ഹമീദ്, ജനറല്‍ കണ്‍വീനർ ഖാന്‍ പാറയില്‍, സൗദി ഐ.എം.സി.സി പ്രസിഡൻറും ലോക കേരള സഭാംഗവുമായ അബ്​ദുല്ലക്കുട്ടി, ബഹ്​റൈന്‍ പ്രസിഡൻറ്​ മൊയ്​തീന്‍ കുട്ടി, ഖത്തർ പ്രസിഡൻറ്​ റഷീദ്, ജി.സി.സി ജോയൻറ്​ കണ്‍വീനർമാരായ റഫീഖ് അഴിയൂർ, കുവൈത്ത് പ്രസിഡൻറ്​ ഹമീദ് മധൂർ, ജനറല്‍ സെക്രട്ടറി ശരീഫ് താമരശ്ശേരി, ഒമാൻ പ്രസിഡൻറ്​ ഹാരിസ് വടകര, ജനറല്‍ സെക്രട്ടറി ഷരീഫ് കൊളവയല്‍, യു.എ.ഇ കമ്മിറ്റി മുൻ സെക്രട്ടറി റഷീദ് താനൂർ തുടങ്ങിയ നിരവധി നേതാക്കൾ സുലൈമാന്‍ സേട്ട്​ സാംസ്​കാരിക കേന്ദ്രത്തി​െൻറ ഭാഗമാകുമെന്നാണ്​ വിമത വിഭാഗം അവകാശപ്പെടുന്നത്​.