ദുബൈയിൽ 'ഡിജിറ്റൽ നാടോടി'കൾ വർധിക്കുന്നു

ദുബൈ: ഏറ്റവും വേഗത്തിൽ വളരുന്ന ലോകത്തെ പത്ത്​ വിദൂര തൊഴിൽ ഹബുകളിൽ ദുബൈയും സ്​ഥാനം പിടിച്ചു. അമേരിക്കൻ പട്ടണങ്ങളായ മിയാമിക്കും ഡെൻവെറിനും ഒപ്പമാണ്​ എമിറേറ്റ്​ ഇക്കാര്യത്തിൽ എണ്ണപ്പെടുന്നത്​. 'നോമാഡ് ലിസ്​റ്റ്​' നടത്തിയ വിശകലനത്തിൽ ലോകത്ത്​ ഇക്കാര്യത്തിൽ ആറാം സ്​ഥാനമാണ്​ ദുബൈക്ക്​​. മെക്​സികോ, സ്​പെയിൻ, യു.എസ്​.എ തുടങ്ങിയ രാജ്യങ്ങളിലെ നഗരങ്ങളാണ്​ പട്ടികയിൽ ആദ്യ സ്​ഥാനങ്ങളിൽ​. നിലവിൽ 1800 വിദൂര ജോലിക്കാർ ദുബൈയിൽ ഉണ്ടെന്ന്​ നൊമാഡ്​ ലിസ്​റ്റ്​ ചൂണ്ടിക്കാണിക്കുന്നു. ഡിജിറ്റൽ നാടോടികൾ എന്ന്​ വിളിക്കപ്പെടുന്ന വിദൂര തൊഴിലാളികൾ വ്യത്യസ്​ത രാജ്യങ്ങളെ തൊഴിലിടമായി ഉപയോഗിക്കുന്നവരാണ്​. 2021ൽ 71 ശതമാനം വളർച്ച ദുബൈ ഇക്കാര്യത്തിൽ കൈവരിച്ചു.

യു.എ.ഇയിൽ താമസിച്ച്​ വിദൂര ജോലികൾ ചെയ്യുന്ന വിദേശികൾക്ക് വിസ അനുവദിക്കുമെന്ന്​ മാർച്ചിൽ അധികൃതർ പ്രഖ്യാപിച്ചിരുന്നു. ഇതോടെയാണ്​ വിദൂര തൊഴിലുകൾക്ക്​ ദുബൈയെ ആശ്രയിക്കുന്നവരുടെ എണ്ണം കൂടിയത്​​. ലോകത്തി​െൻറ വിവിധ പ്രദേശങ്ങളിൽനിന്ന്​ യാത്രക്കും മറ്റുമുള്ള സൗകര്യങ്ങളാണ്​ എമിറേറ്റിനെ പ്രഫഷനലുകളുടെ ആ​ശാകേന്ദ്രമാക്കിയത്​. കോവിഡ്​ വ്യാപന പശ്ചാത്തലത്തിൽ വിദൂര തൊഴിൽ ഹബ്ബുകൾക്ക്​ വലിയ പ്രാധാന്യമാണ്​ കൈവന്നത്​.

യു.എ.ഇയിൽ ഏകവർഷ വിസയാണ്​ വിദൂരജോലിക്കും താമസത്തിനും അനുവദിക്കുന്നത്​. മറ്റൊരു രാജ്യത്തായിരിക്കും ഇത്തരക്കാരുടെ കമ്പനി​. കമ്പനി യു.എ.ഇയിൽ രജിസ്​റ്റർ ചെയ്​തില്ലെങ്കിലും ജോലിക്ക്​ തടസ്സമുണ്ടാകില്ലെന്നതാണ്​ വിസയുടെ മെച്ചം. വിസാ നിബന്ധനകളും വ്യവസ്ഥകളും അനുസരിച്ച് പ്രവർത്തിച്ചാൽ മതി.