മെട്രോയിൽ കയറണമെന്ന്​ ആഗ്രഹം; ദുബൈയോട്​ അതിരറ്റ സ്​നേഹം

2011ൽ കോഴഞ്ചേരി സെൻറ് തോമസ് കോളജി​െൻറ പൂർവ വിദ്യാർഥി കൂട്ടായ്മയായ 'സാന്തോം സ്​നേഹ സ്വാന്തനം' പരിപാടിയിൽ മുഖ്യാതിഥിയായി മാർ ക്രിസോസ്​റ്റം തിരുമേനി യു.എ.ഇയിൽ എത്തിയിരുന്നു. ദുബൈയിൽ എത്തിയ തിരുമേനി ഇവിടെ പല സാംസ്‌കാരിക പരിപാടികളിലും പങ്കെടുത്തു. ഗ്ലോബൽ മീറ്റി​െൻറ മുന്നോടിയായി കറാമയിൽ നടന്ന വാർത്തസമ്മേളനത്തിന് ശേഷം അദ്ദേഹത്തിനൊരു ആഗ്രഹം. ദുബൈ മെട്രോയിൽ കയറണം. അങ്ങനെ സംഘാടകരും അഭ്യുദയകാംക്ഷികളും ചേർന്ന് നേരെ ജഫ്​ലിയ മെട്രോ സ്​റ്റേഷനിലേക്ക്.

അവിടെ അദ്ദേഹത്തെ കണ്ട സ്​റ്റേഷൻ ജീവനക്കാർക്കും ആകാംക്ഷയായി. സ്വയം ടിക്കറ്റ് പഞ്ച് ചെയ്തു ലിഫ്റ്റിൽ പ്ലാറ്റ്​ഫോമിലേക്ക് എത്തിയ തിരുമേനി ഓരോ അഞ്ചു മിനിറ്റിലും ട്രെയിൻ വരുമെന്ന് കേട്ടപ്പോൾ മണിക്കൂറുകളും ദിവസങ്ങളും വൈകി ഓടുന്ന നമ്മുടെ നാട്ടിലെ ട്രെയിനുകളെ കുറിച്ച് പരാമർശം നടത്തിയത് കൂടെയുള്ളവരിൽ ചിരിപടർത്തി. കൂട്ടത്തിൽ ആരോ പറഞ്ഞു 'തിരുമേനി, ദുബൈയിലെ മെട്രോക്ക്​ ഒരു പ്രത്യേകത ഉണ്ട്. ലോകത്തിലെ ആദ്യത്തെ ഡ്രൈവർ ഇല്ലാ ട്രെയിൻ ആണിത്​'. അത് കേട്ടതും തിരുമേനിയും വിട്ടില്ല. 'ഞാൻ ഇത് വരെ കയറിയ എല്ലാ വാഹനത്തിലും ഡ്രൈവർ ഉണ്ടായിരുന്നു, വിമാനത്തിലാണെങ്കിൽ പൈലറ്റും. എവിടെ ആയാലും ഞാൻ ദൈവത്തോട് പ്രാർഥിച്ചാണ് യാത്ര ചെയ്യുന്നത്.

ഈ ഡ്രൈവർ ഇല്ലാ ട്രെയിനിലും പ്രാർഥിച്ചു യാത്ര തുടങ്ങാം' എന്ന് പറയുമ്പോൾ റാഷിദിയ ഭാഗത്തു നിന്നും ട്രെയിൻ വരവായി. അങ്ങനെ ദുബൈ മെട്രോയിൽ യാത്ര ചെയ്ത ലോകത്തെ ഏറ്റവും പ്രായം കൂടിയ ബിഷപ്‌ എന്ന ബഹുമതി അദ്ദേഹം നേടി. ഈ യാത്ര ചെയ്യുമ്പോൾ അദ്ദേഹത്തിന് 93 വയസ്സായിരുന്നു. ട്രെയിനിൽ കയറിയതും യാത്രക്കാർ ആശ്ചര്യത്തോടെ തിരുമേനിയെ നോക്കുവാൻ തുടങ്ങി. ഇതാദ്യമായാണ് ഇങ്ങനെ ഒരാളെ ട്രെയിനിൽ കാണുന്നത്. കണ്ടവർ കണ്ടവർ അനുഗ്രഹത്തിനായി അദ്ദേഹത്തി​െൻറ അടുക്കലേക്കെത്തി. മടിയൊന്നും കൂടാതെ എല്ലാവരെയും അനുഗ്രഹിക്കാനും അദ്ദേഹം സമയം കണ്ടെത്തി.

നഗരക്കാഴ്ചകൾ കണ്ടു ദുബൈയുടെ വികസനത്തെക്കുറിച്ചു അഭിനന്ദനങ്ങൾ അറിയിച്ച തിരുമേനി ഇവിടുത്തെ സ്നേഹമുള്ള ഭരണാധികാരികളെക്കുറിച്ചു വാചാലനായി. അവർ പ്രവാസികളോട് കാണിക്കുന്ന സ്നേഹവും മമതയും എടുത്തു പറഞ്ഞു. ട്രെയിനി​െൻറ വേഗത്തിനൊപ്പം തമാശകളുടെ വരവും കൂടിവന്നു. അങ്ങനെ ജെ നഖീൽ സ്​റ്റേഷനിൽ ഇറങ്ങി. അവിടെ നിന്നും ജഫ്​ലിയ സ്​റ്റേഷനിലേക്ക് മടക്കയാത്ര നടത്തിയത് കൂടെ യാത്ര ചെയ്തവർക്ക് അവിസ്മരണീയ അനുഭവം നൽകി. മാർ ക്രിസോസ്​റ്റം നവതി പദ്ധതിയുടെ ജനറൽ കൺവീനറും മാർത്തോമ സഭയിലെ വൈദികനും കെ.എ. ജോഷ്വയുടെ മകനുമായ ജോബി ജോഷ്വയുടെ വാക്കുകളിൽ അദ്ദേഹത്തി​െൻറ വിയോഗം വല്ലാത്ത ഒരു ശൂന്യത തന്നെയാണെന്ന് പറയുന്നു.

ജോബിയുടെ മുൻകൈയിൽ കോഴഞ്ചേരി സെൻറ് തോമസ് കോളജി​െൻറ പൂർവ വിദ്യാർഥി കൂട്ടായ്മയായ 'സാന്തോം' ദുബൈ വൈസ്മെൻസ്, കേരള കൗൺസിൽ ഓഫ് ചർച്ചസ് എന്നിവയുടെ വിവിധ പരിപാടികളിൽ അദ്ദേഹത്തെ പങ്കെടുപ്പിക്കാനായതും വലിയ ഭാഗ്യമായി കരുതുന്നു. ദുബൈ ജബൽ അലി മാർത്തോമ പള്ളിയിൽ നടന്ന നവതി സമാപന സമ്മേളനം ഉദ്​ഘാടനം ചെയ്തത് അന്നത്തെ ഗതാഗത മന്ത്രി മാത്യു ടി .തോമസ് ആയിരുന്നു.

ഗൾഫിലെ പുതുതലമുറയ്ക്ക് അദ്ദേഹം നൽകിയ ഉപദേശം ഏറെ പ്രസക്​തമാണ്​. ഈ ഗൾഫ് പ്രദേശം മുഴുവൻ വലിയ സാധ്യതകൾ ഉള്ള ഇടമാണ്. സൗകര്യങ്ങളും ധനവും അധികാരവും ഉള്ളപ്പോൾ ദൈവത്തെ മറക്കുവാൻ ഇടയാകരുത്. സാധ്യതകൾ ഒരുക്കിത്തന്ന ദൈവത്തെ പ്രയാസങ്ങളിൽ മാത്രം അന്വേഷിക്കുകയും സമൃദ്ധിയിൽ മറക്കുകയും ചെയ്യുന്നത് തെറ്റാണെന്ന്​ അദ്ദേഹം പലതവണ ഓർമിപ്പിച്ചിരുന്നു.