ദീവ സെക്യൂരിറ്റി നിക്ഷേപം ലോകത്തെവിടെ നിന്നും കൈപ്പറ്റാം

ദുബൈ: ദുബൈ വൈദ്യൂതി ജല അതോറിറ്റി (ദീവ) ഉപഭോക്​താക്കളുടെ സെക്യൂരിറ്റി നിക്ഷേപം ഇനി ലോകത്ത്​ എവിടെ നിന്നും തിരികെ വാങ്ങാം. ദീവയും വെസ്​റ്റേൺ യൂനിയനും ചേർന്നുണ്ടാക്കിയ കരാർ പ്രകാരമാണിത്​. ഡെപോസിറ്റ്​ തിരികെ വാങ്ങാൻ അർഹതയുള്ള ഉപഭോക്​താക്കൾ വെബ്​സൈറ്റോ ആപ്പോ മുഖേനയാണ്​ അപേക്ഷിക്കേണ്ടത്​. നടപടിക്രമങ്ങൾ പൂർത്തിയായാലുടൻ ഇതു സംബന്ധിച്ച സന്ദേശമെത്തും.

യു.എ.ഇയുടെ വിവിധ ഭാഗങ്ങളിലോ ലോകത്ത്​ എവിടെയുമുള്ളതോ ആയ വെസ്​റ്റേൺ യൂനിയൻ ശാഖകളിൽ നിന്ന്​ പണം കൈപ്പറ്റാം. ഉപഭോക്​താക്കളുടെ ബുദ്ധിമുട്ടുകൾ ഒഴിവാക്കാനും സമയം ലാഭിക്കാനും ദീവ നടത്തുന്ന ശ്രമങ്ങളുടെ ഭാഗമാണിത്​. ദീവ സി.ഇ.ഒയും എം.ഡിയുമായ സഇൗദ്​ മുഹമ്മദ്​ അൽ തായറും വെസ്​റ്റേൺ യൂനിയൻ മേഖലാ വൈസ്​ ചെയർമാൻ ഹാതിം സ്​ലീമാനും ഇതു സംബന്ധിച്ച ധാരണയിൽ ഒപ്പുവെച്ചു.

ജനങ്ങളുടെ ജീവിത സൗകര്യങ്ങൾ വർധിപ്പിക്കാനും സേവനം തേടി ഒാഫീസുകളിൽ എത്തേണ്ട അവസ്​ഥ കുറക്കാനും ഉതകുന്ന മികച്ച സർക്കാർ നടപടി ക്രമങ്ങൾ നടപ്പാക്കണമെന്ന്​ യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമി​​​െൻറ ദർശനങ്ങൾക്കടിസ്​ഥാനമായാണ്​ ഇൗ സ്​മാർട്ട്​ സേവനമെന്ന്​ അൽ തായർ പറഞ്ഞു. 

ഗാർഹിക, വാണിജ്യ-വ്യാവസായിക ഉപഭോക്​താക്കൾക്ക്​ തങ്ങളുടെ ജല^വൈദ്യുതി അക്കൗണ്ടുകൾ പുതിയ ഇടങ്ങളിലേക്ക്​ മാറ്റാനും ദുബൈയിലെ മറ്റൊരു കെട്ടിടത്തിലേക്ക്​ മാറുകയാണെങ്കിൽ ഇജാരി കരാർ കിട്ടിയാലുടൻ ഡാറ്റകൾ മാറ്റുവാനും  ജല-വൈദ്യുതി കണക്​ഷനുകൾ വിച്​ചേദിച്ച്​ അവസാന ബില്ല്​ നേടുവാനും സ്​മാർട്ട്​ ആപ്പും വെബ്​സൈറ്റും ഉപയോഗപ്പെടുത്താവുന്നതാണ്​. ബാങ്ക അക്കൗണ്ടുകളിലേക്ക്​  മാറ്റുവാനും എക്​സ്​പ്രസ്​ മെയിൽ വഴി ചെക്കായി സ്വീകരിക്കാനും നിലവിലുള്ള സൗകര്യത്തിനു പുറ​മെയാണ്​ ലോകത്തെവിടെ നിന്നും തുക കൈപ്പറ്റാനുള്ള സംവിധാനം ഒരുക്കിയിരിക്കുന്നത്​.