ഓടുന്ന വാഹനത്തിൽ നൃത്തം; രണ്ട്​ ആഡംബര കാറുകൾ പിടിച്ചെടുത്തു

ദുബൈ: സാമൂഹിക മാധ്യമങ്ങളിൽ പ്രശസ്തി നേടുന്നതിന്​ അപകടകരമായ രീതിയിൽ ​അഭ്യാസപ്രകടനം നടത്തിയ ഡ്രൈവർമാരുടെ വാഹനങ്ങൾ പിടിച്ചെടുത്ത്​ ദുബൈ പൊലീസ്​. നഗരത്തിലെ പൊതു റോഡിലാണ്​ ഓടിക്കൊണ്ടിരിക്കെ വാഹനത്തിൽ കയറി നൃത്തം ചെയ്ത സംഭവമുണ്ടായത്​.

സാമൂഹിക മാധ്യമങ്ങളിൽ പങ്കുവെക്കുന്നതിന്​ പകർത്തിയ വീഡിയോ ദൃശ്യങ്ങളിലെ രണ്ട്​ വാഹനങ്ങളും പിടിച്ചെടുത്ത അധികൃതർ, അഭ്യാസപ്രകടനം നടത്തിയവർക്ക്​ 50,000ദിർഹം വീതം പിഴയും ചുമത്തി. ഇവർ പകർത്തിയ വീഡിയോകൾ സാമൂഹിക മാധ്യമങ്ങളിൽ വൈറലായിരുന്നു.

ഓടിക്കൊണ്ടിരിക്കെ കാറിന്‍റെ ബോണറ്റിൽ കയറി നൃത്തം ചെയ്യുന്നതാണ്​ വീഡിയോകളിലുള്ളത്​. ഇത്തരം അപകടകരമായ സ്വാഭാവം ഡ്രൈവർമാരുടെയും മറ്റു റോഡ്​ ഉപയോക്​താക്കളുടെയും സുരക്ഷക്ക്​ ഗുരുതരമായ ഭീഷണിയാണെന്ന്​ ദുബൈ പൊലീസ്​ ട്രാഫിക്​ വിഭാഗം ആക്ടിങ്​ ഡയറക്ടർ ബ്രി. ജുമാ സാലിം ബിൻ സുവൈദാൻ പറഞ്ഞു.

ഇത്​ ട്രാഫിക്​ നിയമത്തിന്‍റെ വൃക്​തമായ ലംഘനമാണെന്നും ഒരു കാരണവശാലും അംഗീകരിക്കാനാവില്ലെന്നും അദ്ദേഹം കൂട്ടിച്ചേർത്തു. പൊതു റോഡുകൾ അഭ്യാസപ്രകടനത്തിനുള്ളതല്ല. ഓൺലൈനിൽ ഇത്തരം സ്വഭാവങ്ങൾ പ്രോൽസാഹിപ്പിക്കുന്നത്​ അംഗീകരിക്കാനാവില്ല -അദ്ദേഹം കൂട്ടിച്ചേർത്തു.

ഗുരുതരമായ നിയമലംഘനം നടത്തിയ വാഹനങ്ങൾ പിടിച്ചെടുത്താൽ തിരികെ ലഭിക്കാൻ നിയമപ്രകാരം 50,000ദിർഹം അടക്കണം. അപകടകരവും സംശയാസ്പദവുമായ പ്രവർത്തനങ്ങൾ ശ്രദ്ധയിൽപെട്ടാൽ ദുബൈ പൊലീസ്​ ആപ്പിലെ ‘പൊലീസ്​ ഐ’ വഴിയോ അടിയന്തരമല്ലാത്ത കാര്യങ്ങൾക്കുള്ള 901 എന്ന നമ്പറിലോ അറിയിക്കണമെന്ന്​ പൊലീസ്​ ആവശ്യപ്പെട്ടു.