ദുബൈ ലൈബ്രറിയിൽ മാസം മുഴുവൻ സാംസ്കാരിക പരിപാടികൾ

ദുബൈ: മുഹമ്മദ് ബിൻ റാശിദ് ലൈബ്രറി ജൂൺ മാസത്തിൽ വൈവിധ്യമാർന്ന സാംസ്കാരിക പരിപാടികൾ സംഘടിപ്പിക്കും. സന്ദർശകർക്ക് അറിവ് വികസിപ്പിക്കാനും അവരുടെ കഴിവുകൾ പരിപോഷിപ്പിക്കാനുമുള്ള അവസരങ്ങൾ നൽകുന്നതി​ന്​ സഹായിക്കുന്നതാകും പരിപാടികൾ. ദുബൈ നാഷണൽ തിയേറ്ററുമായി സഹകരിച്ച് വർക്​ഷോപ്പാണ്​ ആദ്യ പരിപടി.

റോമിയോ ആൻഡ്​ ജൂലിയറ്റിനെ കേന്ദ്രീകരിച്ചുള്ള ഈ സെഷൻ, പങ്കെടുക്കുന്നവരുടെ എഴുത്ത്​, കലാപ്രകടന കഴിവുകളും വളർത്താൻ ലക്ഷ്യമിട്ടുള്ളതാണ്​. റിഥം ഓഫ് ഡയലക്റ്റ്സ് എന്ന തീമിൽ ശ്രദ്ധേയമായ കവിതാ സായാഹ്നവും ഒരുക്കുന്നുണ്ട്​. എമിറേറ്റ്സ് ഫിലാറ്റലിക് അസോസിയേഷനുമായി സഹകരിച്ച്, ‘എമിറാറ്റി ട്രഷേഴ്‌സ് സീൽഡ് ബൈ ഹിസ്റ്ററി: ഫ്രം മെമ്മറി ആർക്കൈവ്‌സ് ടു ട്രഷേഴ്‌സ് ഫോർ ജനറേഷൻസ്’ എന്ന പേരിൽ രണ്ട് ദിവസത്തെ പ്രദർശനവും ലൈബ്രറി സംഘടിപ്പിക്കും.

മൂന്ന് ദിവസത്തെ കൊറിയൻ ഫിലിം ഫെസ്റ്റിവലും സംഘടിപ്പിക്കുംന്നുണ്ട്​. ഇതിൽ എട്ട് പ്രശസ്ത സിനിമകൾ പ്രദർശിപ്പിക്കും. പരമ്പരാഗത കൊറിയൻ സംഗീത പ്രകടനവും ഫെസ്റ്റിവലിൽ ഉൾപ്പെടും. ഇന്റർനാഷണൽ ഇകെബാന ഫൗണ്ടേഷനുമായി സഹകരിച്ച്, പരമ്പരാഗത ജാപ്പനീസ് പുഷ്പാലങ്കാര കലയായ ഇകെബാനയെക്കുറിച്ച് ലൈബ്രറി ഒരു വർക്ക്‌ഷോപ്പും ഒരുക്കുന്നുണ്ട്​. കൂടുതൽ വിവരങ്ങൾക്ക്​ ഔദ്യോഗിക വെബ്‌സൈറ്റ് www.mbrl.ae സന്ദർശിക്കുക.