1.10 കോടി ദിർഹം മോഷ്​ടിച്ച്​ കാമുകന്​  ആഢംബര സമ്മാനങ്ങൾ;  പ്രതി അറസ്​റ്റിൽ

അബൂദബി: അബൂദബിയിലെ സർക്കാർ സ്​ഥാപനത്തിൽ നിന്ന്​ 1.10 കോടി ദിർഹം മോഷ്​ടിച്ച കേസിൽ ഉപഭോക്​തൃ സേവന വിഭാഗം ഡയറക്​ടറായിരുന്ന യുവതി പിടിയിൽ. വിവാഹ വാഗ്​ദാനം നൽകിയ യുവാവിന്​ ആഡംബര സമ്മാനങ്ങൾ നൽകാനാണ്​ ഇവർ പണം  ചെലവഴിച്ചിരുന്നത്​. ഒൗദ്യോഗിക പദവി ദുരുപയോഗം ചെയ്​താണ്​ ഇവർ പണം കവർന്നതെന്ന്​ അന്വേഷണത്തിൽ വ്യക്​തമായതിനെ തുടർന്നാണ്​ അറസ്​റ്റെന്ന്​ അബൂദബി പൊലീസ്​ കുറ്റാന്വേഷണ വിഭാഗം ഉപ ഡയറക്​ടർ കേണൽ താരീഖ്​ അൽ ഗൗൽ വ്യക്​തമാക്കി. 33 വയസുള്ള പ്രതി   26 കാരനായ യുവാവുമായി ബന്ധത്തിലായിരുന്നു. വിവാഹിതനായ ഇയാൾ ഇക്കാര്യം മറച്ചുവെച്ചാണ്​ യുവതിയെ വിവാഹം ചെയ്യാമെന്ന്​ ഉറപ്പു നൽകിയിരുന്നത്​. യുവാവ്​ വരുത്തിയ ബാങ്ക്​ കടങ്ങൾ വീട്ടിയ സ്​ത്രീ ഇയാൾക്കും സഹോദരനും റോൾസ്​ റോയ്​സ്​ ഉൾപ്പെടെ വിലപിടിച്ച കാറുകളും നമ്പർ പ്ലേറ്റുകളും ബ്രാൻറഡ്​ വാച്ചുകളും യൂറോപ്പിലേക്ക്​ ബിസിനസ്​ ക്ലാസ്​ ടിക്കറ്റും മറ്റും സമ്മാനിക്കുകയും ചെയ്​തു. യുവതിയെ ചൂഷണം ചെയ്​ത ക​ുറ്റത്തിന്​ കാമുകനെയും സഹോദരനെയും പൊലീസ്​ പിടികൂടി. ഇൗ പണമുപയോഗിച്ച്​ വാങ്ങിയ റോൾസ്​ റോയ്​സ്​, റേഞ്ച്​റോവർ കാറുകളും മറ്റു ചില വസ്​തുക്കളും പിടിച്ചെടുത്തതായി പൊലീസ്​ അറിയിച്ചു. ചോദ്യം ചെയ്യലിൽ കുറ്റം സമ്മതിച്ച പ്രതി കൂട്ടുകാരനെയും സുഹൃത്തുക്കളെയും താൻ സാമ്പത്തികമായി ഉന്നത നിലയിലാണെന്ന്​ ബോധ്യപ്പെടുത്താൻ ലക്ഷ്യമിട്ടാണ്​ ഇതു ചെയ്​തതെന്നും പൊലീസിനോടു പറഞ്ഞു.