ഒളിച്ചോടിയ ആയയെ വാട്​സാപ്പിലൂടെ  വിൽക്കാൻ ശ്രമം; നാല്​​ പേർക്ക്​  അഞ്ച്​ വർഷം തടവ്​

ദുബൈ: ജോലി ഭാരം മൂലം ഒളിച്ചോടിയ വനിതയെ വിൽക്കാൻ ശ്രമിച്ച നാല്​​ പേരെ അഞ്ച്​ വർഷം തടവിന്​ ദുബൈ കോടതി ശിക്ഷിച്ചു. 41 വയസുള്ള ഇന്തോനേഷ്യൻ വനിതയെ 5,500 ദിർഹം വിലയിട്ട്​ വാട്​സാപ്പിലൂടെ വിൽക്കാനാണ്​ ഇവർ ശ്രമിച്ചത്​. വിൽപനക്ക്​ ശ്രമിച്ച 25 ഉം 28 ഉം വയസുള്ള ബംഗ്ലാദേശ്​ സ്വദേശികളെയും ഇവരെ സഹായിച്ച 36 ഉം 31 ഉം വയസുള്ള മറ്റ്​ രണ്ട്​ ബംഗ്ലാദേശികളെയുമാണ്​ ശിക്ഷിച്ചത്​. ഇവരോട്​ ഒരു ലക്ഷം ദിർഹം പിഴ അടക്കാനും നിർദേശിച്ചിട്ടുണ്ട്​. ഇരയേയും പ്രതിളെയും നാടുകടത്തണമെന്നും ഉത്തരവിലുണ്ട്​. അൽ മുറാഖാബാദ്​ പൊലീസ്​ കഴിഞ്ഞ ഫെബ്രുവരി അഞ്ചിനാണ്​ ഇവരെ പിടികൂടിയത്​. 

ഇരയായ സ്​ത്രീയെ ദുബൈ ഫൗണ്ടേഷൻ ഫോർ വുമൺ ആൻറ്​ ചിൽഡ്ര​​​െൻറ സംരക്ഷണയിൽ പാർപ്പിച്ചിരിക്കുകയാണ്​. അബൂദബിയിൽ ഒരു സ്വദേശിയുടെ വീട്ടിൽ ആയയുടെ ജോലിക്കായി കഴിഞ്ഞ വർഷം ജനുവരിയിലാണ്​ ഇവർ യു.എ.ഇയിലെത്തിയത്​. ജോലി ഭാരം കുടിയപ്പോൾ അവിടെ നിന്ന്​ രക്ഷപെട്ടാൽ കൊള്ളാമെന്ന്​ ഇവർ പരിചയക്കാരിയായ ഒരു സ്​ത്രീയോട്​ പറഞ്ഞതോടെയാണ്​ ദുരിതം തുടങ്ങുന്നത്​. പരിചയക്കാരി മറ്റൊരു സ്​ത്രീയെ പരിചയപ്പെടുത്തിക്കൊടുത്തു. 

ഇൗ സ്​ത്രീയാണ്​ 1500 ദിർഹം ശമ്പളത്തിന്​ താൽക്കാലിക ജോലിയുണ്ടെന്ന്​ പറഞ്ഞ്​ അനാശാസ്യ കേന്ദ്രം നടത്തുന്ന പ്രതികളുടെ അടുത്ത്​ എത്തിച്ചത്​. ഇൗ സ്​ത്രീയെ പൊലീസ്​ തെരയുകയാണ്​. ഇന്തോനേഷ്യൻ വനിതയെ വിൽക്കാൻ ശ്രമം നടക്കുന്നതറിഞ്ഞ പൊലീസ്​ തന്ത്രപൂർവം പ്രതികളെ കുടുക്കുകയായിരുന്നു. 
സ്​ത്രീയുമായി പോകവെ കാർ തടഞ്ഞാണ്​ രണ്ട്​ പ്രതികളെ പിടികൂടിയത്​. പൊലീസ്​ വളഞ്ഞപ്പോഴും താൻ വിൽക്കപ്പെടുകയാണെന്ന വിവരം അറിഞ്ഞിരുന്നില്ലെന്ന്​ ഇന്തോനേഷ്യൻ വനിത കോടതിയിൽ നൽകിയ മൊഴിയിൽ പറയുന്നു.