അബൂദബിയിൽ ക്രെയിൻ വീണ്​ ഏഴ്​ കാറുകൾ തകർന്നു

അബൂദബി: അബൂദബിയിൽ കെട്ടിടനിർമാണത്തിനിടെ ക്രെയിൻ തകർന്ന്​ കാറുകൾക്ക്​ ​മേൽ വീണു. തിങ്കളാഴ്​ച ഉച്ചക്ക്​ ശേഷം ടൂറിസ്​റ്റ്​ ക്ലബ്​ പരിസരത്താണ്​ സംഭവം. അപകടത്തിൽ ഏഴ്​ കാറുകൾ തകർന്നു. ആർക്കും പരിക്കില്ല. ഇതു സംബന്ധിച്ച്​ സെൻട്രൽ ഒാപറേഷൻസ്​ റൂമിൽ വിവരം ലഭിച്ചയുടൻ സിവിൽ ഡിഫൻസ്​ ഉദ്യോഗസ്​ഥരും രക്ഷാസംഘവും പൊലീസും സംഭവസ്​ഥല​​ത്തേക്ക്​ കുതിച്ചെത്തിയതായി അബൂദബി പൊലീസ്​ അറിയിച്ചു. 

സമീപത്ത്​ പാർക്ക്​ ചെയ്​തിരുന്ന ഏഴ്​ കാറുകൾ തകർന്നുവെന്ന്​ അബൂദബി സിവിൽ ഡിഫൻസ്​ വകുപ്പ്​ ഡയറക്​ടർ ജനറൽ ബ്രിഗേഡിയർ ജനറൽ മുഹമ്മദ്​ മയൂഫ്​ ആൽ കെത്​ബി പറഞ്ഞു. ക്രെയിൻ തകർച്ചയുടെ കാരണം വ്യക്​തമായിട്ടില്ല. നിർമാണ സ്​ഥലത്ത്​ ക്രെയിനുകളുടെയും മറ്റു യന്ത്രങ്ങളുടെയും സുരക്ഷ ഉറപ്പ്​ വരുത്തുന്നതിന്​ നിർമാണ കമ്പനികളും കരാറുകാരും നടപടി സ്വീകരിക്കണമെന്ന്​ ജനറൽ മുഹമ്മദ്​ മയൂഫ്​ ആൽ കെത്​ബി നിർദേശിച്ചു.