കോവിഡ്​ വാക്​സിൻ : ദുബൈ താമസക്കാരിൽ 64 ശതമാനം രണ്ടു ഡോസ്​ പൂർത്തിയാക്കി

ദുബൈ: 23 ലക്ഷം ദുബൈ താമസക്കാർ കോവിഡ്​ വാക്​സി​െൻറ ഇരു ഡോസുകളും സ്വീകരിച്ചതായി ആരോഗ്യവകുപ്പ്​ അധികൃതർ അറിയിച്ചു.

ഇത്​ ആ​കെ താമസക്കാരുടെ 64 ശതമാനമാണ്​. 83 ശതമാനം പേരും വാക്​സിൻ ഒരു ഡോസെങ്കിലും പൂർത്തിയാക്കിയെന്നും ദുബൈ ആരോഗ്യ വകുപ്പ്​ ഡെ. ഡയറക്​ടർ ജനറൽ ഡോ. അലവി അൽ ശൈഖ്​ അലി വ്യക്​തമാക്കി. ഈ വർഷം അവസാനത്തോടെ മുഴുവൻപേർക്കും വാക്​സിൻ നൽകാനുള്ള പദ്ധതി വിജയിപ്പിക്കാനുള്ള പാതയിലാണെന്നും അദ്ദേഹം വ്യക്​തമാക്കി. പ്രായമേറിയവരിൽ 95 ശതമാനം പേരും വാക്​സിൻ സ്വീകരിച്ചു. യു.എ.ഇയിൽ 1.30 കോടി വാക്​സിൻ നൽകി​. നൂറുപേർക്ക്​ 139.38 ഡോസുകൾ എന്ന ​തോതിലാണ്​ വിതരണം പൂർത്തിയായത്​.

വാക്​സിൻ വിതരണത്തിൽ ലോകത്തെ ഏറ്റവും കൂടിയ നിരക്കാണിത്​. നിലവിൽ കോവിഡ്​ ബാധ സ്​ഥിരീകരിക്കുന്നവരിൽ കൂടുതലും കുത്തിവെപ്പെടുക്കാത്തവരാണെന്ന്​ ഡോ. അലവി വ്യക്​തമാക്കി. കോവിഡ്​ വരുന്ന പത്തിൽ എട്ടുപേരും വാക്​സിൻ എടുക്കാത്തവരാണ്​. ആശുപത്രിയിൽ ചികിത്സതേടുകയും ഐ.സി.യുവിൽ അഡ്​മിറ്റാവുകയും ചെയ്യുന്നവരിൽ പത്തിൽ ഒമ്പതുപേരും വാക്​സിൻ സ്വീകരിക്കാത്തവരാണ്​. ഇതെല്ലാം വാക്​സിൻ കോവിഡ്​ സാധ്യത കുറക്കുന്നുവെന്ന്​ തെളിയിക്കുന്നതായും ഡോ. അലവി വ്യക്​തമാക്കി. നേരത്തെ അബൂദബി പൊതു ആരോഗ്യകേന്ദ്രം നടത്തിയ പഠനത്തിൽ യു.എ.ഇ തലസ്​ഥാനത്ത്​ വാക്​സിന്​ ശേഷം ആരും കോവിഡ്​മൂലം മരിച്ചിട്ടില്ലെന്ന്​ കണ്ടെത്തിയിരുന്നു.

രണ്ടു ഡോസും സ്വീകരിച്ചവർക്ക്​ വളരെ കുറഞ്ഞ ശതമാനം രോഗസാധ്യത മാത്രമേയുള്ളൂവെന്നും പഠനം വെളിപ്പെടുത്തി. ഈ സാഹചര്യത്തിലാണ്​ കൂടുതൽ ആളുകളിലേക്ക്​ വാക്​സിൻ എത്തിക്കാൻ ആരോഗ്യവകുപ്പ്​ ശ്രമംതുടരുന്നത്​. കുട്ടികളിലും വാക്​സിൻ പരീക്ഷിച്ചശേഷം വിതരണം ചെയ്യാൻ നടപടി ആരംഭിച്ചു.