കോവിഡ്​ കേസുകൾ ഏറുന്നു; ജാഗ്രത വേണമെന്ന്​ മുന്നറിയിപ്പ്​

ദുബൈ: യു.എ.ഇയിൽ ചെറിയപെരുന്നാൾ അവധിക്ക്​ ശേഷം കോവിഡ്​ കേസുകളിൽ വർധനയുണ്ടായ സാഹചര്യത്തിൽ ജാഗ്രതാ മുന്നറിയിപ്പുമായി അധികൃതർ. വേനലവധി ആരംഭിക്കാനിരിക്കെ സുരക്ഷാമാനദണ്ഡങ്ങളിൽ വിട്ടുവീഴ്​ച ചെയ്​താൽ കേസുകൾ വർധിക്കുമെന്നാണ്​ മുന്നറിയിപ്പ്​​. കോവിഡ്​ കേസുകൾ കൂടാൻ കാരണം ഒത്തുചേരലുകളും സുരക്ഷാനിർദേശങ്ങൾ പാലിക്കാത്തതുമാണെന്ന്​ യു.എ.ഇ ആരോഗ്യവകുപ്പ്​ ഔദ്യോഗിക വക്​താവ്​ ഡോ. ഫരീദ അൽ ഹുസനി പറഞ്ഞു.

മാസ്​ക്​ ധരിക്കുന്നതിലും സാമൂഹികഅകലം പാലിക്കുന്നതിലും വിട്ടുവീഴ്​ച പാടില്ലെന്നും അവർ ആവശ്യപ്പെട്ടു. വാക്​സിൻ സ്വീകരിച്ചവരും നിയന്ത്രണങ്ങൾ പാലിക്കണമെന്ന്​ ഡോ. ഫരീദ പറഞ്ഞു. ജൂലൈയിൽ ബലിപെരുന്നാൾ അവധികൂടി വരുന്നതിനാൽ ആഘോഷ, ഒത്തുചേരൽ സമയങ്ങളിൽ ജാഗ്രതവേണമെന്നും അധികൃതർ ആവശ്യപ്പെടുന്നു.

മേയ്​ ആദ്യപകുതിവരെ 1500ന്​ താഴെയായിരുന്നു ദിനംപ്രതി കോവിഡ്​ കേസുകളുടെ എണ്ണം. എന്നാൽ, അതിന്​ ശേഷം പതിയെ വർധിക്കുകയും നിലവിൽ രണ്ടായിരത്തിലധികം കേസുകൾ റിപ്പോർട്ട്​ ചെയ്യപ്പെടുകയുമായി​. ലോകത്ത്​ പുതിയ വകഭേദങ്ങൾ കണ്ടെത്തുന്ന സാഹചര്യത്തിൽ വാക്​സിൻ എടുക്കാത്തവർക്ക്​ അപകടസാധ്യത കൂടുതലാണെന്നും അത്തരമാളുകൾ കുത്തിവെപ്പ്​ കേന്ദ്രങ്ങളിൽ ഹാജരാകണമെന്നും ആരോഗ്യവകുപ്പ്​ ആവശ്യപ്പെട്ടു. 16ന്​ മുകളിൽ പ്രായമുള്ള 87 ശതമാനം താമസക്കാർ യു.എ.ഇയിൽ ആദ്യവാക്​സിൻ സ്വീകരിച്ചിട്ടുണ്ട്​.