യു.എ.ഇയിൽ നിന്ന്​ ആദ്യ വിമാനങ്ങൾ കൊച്ചിക്കും കോഴിക്കോടിനും

ദുബൈ: കോവിഡ്​ പ്രതിസന്ധിയെ തുടർന്ന വിദേശത്ത്​ കുടുങ്ങിപ്പോയവരെ നാട്ടിലെത്തിക്കാൻ ഇന്ത്യൻ സർക്കാർ സജ്ജമാക്കുന്ന ആദ്യ വിമാനങ്ങൾ സർവീസ്​ നടത്തുക കൊച്ചിയിലേക്കും കോഴിക്കോ​േട്ടക്കും. മെയ്​ ഏഴിന്​ അബുദബിയിൽ നിന്ന്​ കൊച്ചിയിലേക്കും ദുബൈയിൽ നിന്ന്​ കോഴിക്കോ​േട്ടക്കുമാണ്​ പ്രവാസികളെ വഹിച്ചു കൊണ്ടുള്ള ആദ്യ വിമാനങ്ങൾ പറക്കുക.

തുടർ ദിവസങ്ങളിൽ ഇന്ത്യയിലെ മറ്റു കേന്ദ്രങ്ങളിലേക്കും പ്രത്യേക സർവീസ്​ നടത്തും.ഇതിൽ യാത്ര ചെയ്യുന്നവരുടെ അന്തിമ പട്ടിക അബൂദബിയിലെ ഇന്ത്യൻ എംബസിയും ദുബൈ ഇന്ത്യൻ കോൺസുലേറ്റും ​േചർന്ന്​ തയ്യാറാക്കും. നാട്ടിലേക്ക്​ തിരിച്ചെത്താൻ താൽപര്യം അറിയിച്ച്​ രണ്ടു ലക്ഷത്തോളം പേരാണ്​ യു.എ.ഇയിൽ രജിസ്​റ്റർ ചെയ്​തത്​. ഇതിൽ വലിയ ഒരു ഭാഗവും മലയാളികളാണ്​.

തൊഴിൽ നഷ്​ടപ്പെട്ടവർ, വയോധികർ,അടിയന്തിര വൈദ്യ സഹായം ആവശ്യമുള്ളവർ, ഗർഭിണികൾ, മറ്റു ബുദ്ധിമുട്ടുകൾ മൂലം ദുരിതപ്പെടുന്നവർ എന്നിവർക്കെല്ലാമാവും പ്രഥമ പരിഗണന നൽകുകയെന്ന്​ ഇന്ത്യൻ കോൺസുലേറ്റ്​ വ്യക്​തമാക്കി. 

നേരത്തേ രജിസ്​റ്റർ ചെയ്​ത ആളുകളെ നയ​തന്ത്ര കാര്യാലയങ്ങൾ ഫോണും ഇമെയിലും മുഖേനെ ബന്ധപ്പെട്ട്​ യാത്രാ വിവരം അറിയിക്കും. ടിക്കറ്റ്​ ചെലവ്​, ക്വാറൻറീൻ വ്യവസ്​ഥകൾ എന്നിവയും യാത്രക്കാരെ നേരിട്ട്​ അറിയിക്കും. ഇവ പാലിക്കുവാൻ സമ്മതമറിയിക്കുന്നവരെ മാത്രമേ യാത്രക്ക്​ പരിഗണിക്കുകയുള്ളൂ. 

നാട്ടിലേക്ക്​ മടങ്ങാൻ ആഗ്രഹിക്കുന്ന എല്ലാവരേയും തിരിച്ചെത്തിക്കുന്നതിന്​ സമയമെടുക്കുമെന്ന്​ അധികൃതർ ഒാർമപ്പെടുത്തി. യാത്രയുമായി ബന്ധപ്പെട്ട അന്വേഷണങ്ങൾക്കായി എംബസിയും കോൺസുലേറ്റും സന്ദർശിക്കുന്നതും ഒഴിവാക്കണം. 

കോവിഡ്​ പ്രതിസന്ധിയുമായി ബന്ധപ്പെട്ട സംശയങ്ങൾക്ക്​ പ്രവാസി ഭാരതീയ സഹായകേന്ദ്രയുടെ 80046342 എന്ന ടോൾ ഫ്രീ നമ്പറിൽ വിളിക്കാം.    ഇതിനു പുറമെ ഇന്ത്യൻ എംബസിയും (0-508995583) ദുബൈ ഇന്ത്യൻ കോൺസുലേറ്റും ( 0-565463903, 0543090575) ഒരുക്കിയിരിക്കുന്ന കോവിഡ്​ ഹെൽപ്​ലൈനുകളിലും ബന്ധപ്പെടാം.
ഇമെയിൽ:  help.abudhabi@mea.gov.in, cons2.dubai@mea.gov.in