സ്വഭാവ സര്‍ട്ടിഫിക്കറ്റ്: നിബന്ധന നീക്കിയിട്ടില്ലെന്ന്​ തൊഴില്‍ മന്ത്രാലയം

ദുബൈ: യു.എ.ഇയില്‍ തൊഴില്‍വിസ ലഭിക്കാന്‍ നാട്ടിലെ സ്വഭാവ സര്‍ട്ടിഫിക്കറ്റ് വേണമെന്ന നിബന്ധന ഇതുവരെ പിന്‍വലിച്ചിട്ടില്ലെന്ന്​ തൊഴില്‍ മന്ത്രാലയം. എന്നാൽ നിബന്ധന ഒഴിവാക്കിയെന്ന് ചില റേഡി​േയാകളും ഒാൺലൈൻ മാധ്യമങ്ങളും റിപ്പോര്‍ട്ട് ചെയ്​തത്​ തൊഴിലന്വേഷകരെയും വിസാ അപേക്ഷകരെയും ആശയക്കുഴപ്പത്തിലാക്കി. ഇതോടെയാണ്​ ഇത്​ സംബന്ധിച്ച സംശയത്തിന്​ ട്വിറ്ററിലൂടെ മന്ത്രാലയം മറുപടി നൽകിയത്​. ഫെബ്രുവരി നാല് മുതലാണ് യു.എ.ഇയില്‍ തൊഴില്‍ വിസ ലഭിക്കുന്നതിന് നാട്ടില്‍ നിന്നുള്ള സ്വഭാവ സര്‍ട്ടിഫിക്കറ്റ് ​േവണമെന്ന നിയമം വന്നത്​. പുതിയ തൊഴിൽ വിസക്ക്​ അ​േപക്ഷിക്കു​േമ്പാൾ ക്രിമിനൽ പശ്​ചാത്തലം ഇല്ലാത്തവരാണെന്ന്​ തെളിയിക്കുന്നതിനായിരുന്നു ഇത്​. കുറ്റകൃത്യങ്ങൾ നടത്തുന്ന പ്രവാസികളുടെ എണ്ണം ഏറിയ സാഹചര്യത്തിലായിരുന്നു​ തീരുമാനം. വിസ പുതുക്കുന്നതിന് ഇത്​ ബാധകമാക്കിയിട്ടില്ല.​ 

സ്വഭാവ സര്‍ട്ടിഫിക്കറ്റ് സമ്പാദിക്കാനും അത് സാക്ഷ്യപ്പെടുത്താനും തൊഴിലന്വേഷകര്‍ നെട്ടോട്ടത്തിലാണ്​​. ഇതിനിടയിലാണ്​ നിബന്ധന പിന്‍വലിച്ചു എന്ന് ചില മാധ്യമങ്ങൾ റിപ്പോര്‍ട്ട് നല്‍കിയത്. ഇന്ത്യയടക്കം ഒമ്പത് രാജ്യങ്ങളെ നിബന്ധനയില്‍ നിന്ന് ഒഴിവാക്കി വിസാ സേവനകേന്ദ്രങ്ങള്‍ക്ക് സര്‍ക്കുലര്‍ ലഭിച്ചു എന്നായിരുന്നു റിപ്പോര്‍ട്ട്. വിസാ സേവനകേന്ദ്രങ്ങളായ തസ്ഹീലി​​​െൻറ കമ്പ്യൂട്ടര്‍ സിസ്​റ്റത്തില്‍ നിന്ന് സ്വഭാവ സര്‍ട്ടിഫിക്കറ്റ് സമര്‍പ്പിക്കാനുള്ള ഓപ്ഷനും അപ്രത്യക്ഷമായി. എന്നാല്‍, തൊഴില്‍വിസക്ക് നാട്ടില്‍ നിന്നുള്ള സ്വഭാവ സര്‍ട്ടിഫിക്കറ്റ് വേണമെന്ന നിബന്ധനയില്‍ മാറ്റമൊന്നും വരുത്തിയിട്ടില്ല എന്നാണ് തൊഴില്‍മന്ത്രാലയം ഉദ്യോഗസ്​ഥർ മറുപടി നല്‍കുന്നത്. 

തസ്ഹീല്‍ സേവനകേന്ദ്രങ്ങളും, ടൈപ്പിങ് സ​​െൻററുകളും സ്വഭാവസര്‍ട്ടിഫിക്കറ്റ് ഇല്ലാതെ സമര്‍പ്പിച്ച പല വിസാ അപേക്ഷകളും തള്ളുകയും ചെയ്​തു. അധ്യാപക ജോലിക്കുള്ള അപേക്ഷകളും ഇതിൽപെടും. തർക്കമായതോടെ കുപ്രചരണങ്ങളിൽ അകപ്പെടരുതെന്ന്​ കാട്ടി ടൈപ്പിങ്​ സ​​െൻറർ നടത്തിപ്പുകാരും രംഗത്തെത്തി. വരും ദിവസങ്ങളില്‍ ഇതുസംബന്ധിച്ച ഔദ്യോഗിക വിശദീകരണം പുറത്തുവരുമെന്ന പ്രതീക്ഷയിലാണ് തൊഴിലന്വേഷകരും ഈ രംഗത്ത് പ്രവര്‍ത്തിക്കുന്നവും.