സ്വഭാവ സർട്ടിഫിക്കറ്റ്​: ഫിലിപ്പീൻസുകാർക്കും ഇന്തോനേഷ്യക്കാർക്കും സാവകാശം

അബൂദബി: തൊഴിൽ വിസ ലഭിക്കാൻ സ്വന്തം രാജ്യത്തെ അധികൃതരിൽനിന്ന്​ സ്വഭാവ സർട്ടിഫിക്കറ്റ്​ ഹാജരാക്കുന്നതിന്​ ഫിലിപ്പീൻസ്​, ഇന്തോനേഷ്യ രാജ്യക്കാർക്ക്​ സമയം നീട്ടിനൽകി. യു.എ.ഇ മാനവ വിഭവശേഷി-സ്വകാര്യവത്​കരണ മന്ത്രാലയം തസ്​ഹീൽ കേന്ദ്രങ്ങൾക്ക്​ അയച്ച സർക്കുലറിലാണ്​ ഇക്കാര്യം വ്യക്​തമാക്കുന്നത്​. 2018 ജൂൺ വരെയാണ്​ ഇൗ രാജ്യക്കാർക്ക്​ സാവകാശം നൽകിയത്​.ഫെബ്രുവരി നാലിനാണ്​ വിസ അപേക്ഷക്കൊപ്പം സ്വഭാവ സർട്ടിഫിക്കറ്റ്​ സമർപ്പിക്കണമെന്ന നിയമം പ്രാബല്യത്തിലായത്​. ഫിലിപ്പീൻസ്​, ഇന്തോനേഷ്യ രാജ്യക്കാരല്ലാത്തവർക്ക്​ ഫെബ്രുവരി നാല്​ മുതൽ നിയമം ബാധകമാണ്​. സന്ദർശക വിസയിലെത്തി തൊഴിൽവിസക്ക്​ അപേക്ഷിക്കുന്നവരും സ്വഭാവ സർട്ടിഫിക്കറ്റ്​ ഹാജരാക്കണമെന്ന്​ സർക്കുലർ വ്യക്​തമാക്കുന്നു. 

രാജ്യത്തെ തൊഴിലിനുള്ള നടപടിക്രമങ്ങൾ തസ്​ഹീൽ കേന്ദ്രങ്ങൾ വഴിയോ ഒാൺലൈനായോ പൂർത്തിയാക്കാം. പുതിയ നിയമം പാലിക്കാത്ത തസ്​ഹീൽ കേന്ദ്രങ്ങൾ നിയമനടപടിക്ക്​ വിധേയരാകേണ്ടിവരും. സ്വന്തം രാജ്യത്തുനിന്നോ അവസാനമായി അഞ്ച്​ വർഷം താമസിച്ച രാജ്യത്തുനിന്നോ ഉള്ള സ്വഭാവ സർട്ടിഫിക്കറ്റാണ്​ ഹാജരാക്കേണ്ടത്​. സർട്ടിഫിക്കറ്റുകൾ അതത്​ രാജ്യത്തെ യു.എ.ഇ എംബസികളോ യു.എ.ഇ വിദേശകാര്യ^അന്താരാഷ്​ട്ര സഹകരണ മന്ത്രാലയത്തിലെ കസ്​റ്റമർ ഹാപ്പിനസ്​ സ​​െൻററുകളുടെ അറ്റസ്​റ്റേഷൻ കേന്ദ്രങ്ങളോ സാക്ഷ്യപ്പെടുത്തിയിരിക്കണം.