കമ്പനിയുടെ വിവരം ചോർത്തി: ഉടമയ്ക്ക് ജീവനക്കാരി 50,000 ദിർഹം നൽകാൻ വിധി

അബൂദബി: കമ്പനിയുമായി ബന്ധപ്പെട്ട രഹസ്യവിവരങ്ങള്‍ ചോര്‍ത്തി നല്‍കിയ ജീവനക്കാരിയോട് തൊഴിലുടമയ്ക്ക് 50,000 ദിര്‍ഹം നഷ്ടപരിഹാരം നല്‍കാന്‍ കോടതി വിധി. അബൂദബി ഫാമിലി, സിവില്‍ ആന്‍ഡ് അഡ്മിനിസ്‌ട്രേറ്റീവ് ക്ലെയിംസ് കോടതിയുടേതാണ് ഉത്തരവ്. ജീവനക്കാരി ഓഫിസിലെ ഉടമയുടെ ഇമെയില്‍ മുഖേന കമ്പനി രേഖകള്‍ ചോത്തുകയായിരുന്നു. തുടർന്ന്​ വൈകാതെ ഇവർ സ്ഥാപനത്തില്‍ നിന്ന് കിട്ടാനുള്ള വേതനവും മറ്റ് തുകകളും കൈപ്പറ്റിയ ശേഷം രാജിവച്ചു. ഇതിനു ശേഷം കമ്പനി നടത്തിയ ആഭ്യന്തര അന്വേഷണത്തിലാണ് ജീവനക്കാരി കമ്പനിയുമായി ബന്ധപ്പെട്ട രഹസ്യരേഖകള്‍ ചോര്‍ത്തി നല്‍കിയതായി കണ്ടെത്തിയത്.

തുടന്ന്​ കമ്പനി ക്രിമിനല്‍ പരാതി നല്‍കുകയായിരുന്നു. പരാതി പരിഗണിച്ച കോടതി തെളിവുകള്‍ പരിശോധിച്ച് യുവതിക്കെതിരേ 30,000 ദിര്‍ഹം പിഴചുമത്തി. ഈ വിധി അപ്പീല്‍ കോടതിയും ശരിവെച്ചു. ഇതിനു ശേഷം യുവതിയില്‍ നിന്ന് 51,000 ദിര്‍ഹം നഷ്ടപരിഹാരം ആവശ്യപ്പെട്ട് സ്ഥാപനം സിവില്‍ കേസ് ഫയല്‍ ചെയ്തു. കേസില്‍ വാദം കേട്ട കോടതി എതിര്‍കക്ഷിയായ യുവതിയോട് 50,000 ദിര്‍ഹം സ്ഥാപനത്തിന് നഷ്ടപരിഹാരമായി നല്‍കാന്‍ ഉത്തരവിടുകയായിരുന്നു.