രാഷ​്ട്രീയവും കച്ചവടവും സമൂഹ നന്മക്ക്​ ഉപകരിക്കണം -പി.വി. അബ്​ദുൽ വഹാബ്‌ എം.പി

ഷാർജ: രാഷ്​ട്രീയവും കച്ചവടവും സമൂഹ നന്മക്ക്​ ഉപകരിക്കണന്ന് പി.വി. അബ്​ദുൽ വഹാബ്‌ എം.പി അഭിപ്രായപ്പെട്ടു. ബിസിനസുകാരുടെയും രാഷ്​ട്രീയക്കാരുടെയും ഇച്​ഛാശക്തിയിലാണ്​ കോഴിക്കോട്ടും നെടുമ്പാശേരിയിലും വിമാനത്താവളങ്ങൾ യാഥാർഥ്യമായതെന്നും കമോൺ കേരള ബിസിനസ്‌ കോൺക്ലേവിൽ സംസാരിക്കവെ അദ്ദേഹം പറഞ്ഞു. താൻ പാരമ്പര്യമായി തുടരുന്ന രാഷ്​ട്രീയത്തിലാണ്‌ ഇപ്പോഴും നിലകൊള്ളുന്നത്​. അല്ലാതെ സ്ഥാനമാനങ്ങൾക്കായി നിലപാടുകൾ മാറ്റുന്ന ആളല്ല. വർഗീയ ഫാഷിസ്​റ്റ്​ വിരുദ്ധ ചേരിക്ക്‌ ശക്തി പകരാൻ ആ കാലഘട്ടത്തി​​​െൻറ ആവശ്യമെന്ന നിലയിലാണ്​ കൈരളി ചാനലുമായി സഹകരിച്ചതെന്നും അബ്​ദുൽ വഹാബ്‌ പറഞ്ഞു.

ചൈന, കൊറിയ തുടങ്ങിയ രാജ്യങ്ങൾ പ്രാഗൽഭ്യമുള്ളവരെ മാത്രം വിദേശത്തേക്ക്‌ അയക്കുമ്പോൾ നമ്മുടെ രാജ്യം പലപ്പോഴും അങ്ങനെയല്ല. പരമ്പരാഗത വിദ്യഭ്യാസ സമ്പ്രദായത്തിൽനിന്ന്​ മാറി  കാലഘട്ടത്തി​​​െൻറ ആവശ്യത്തിനനുസരിച്ച വിദ്യാഭ്യാസ മാതൃകയിലേക്ക്‌ മാറാൻ കഴിഞ്ഞാലേ പുരോഗതിയുണ്ടാകൂ എന്നും അദ്ദേഹം പറഞ്ഞു. ഗൾഫിലെ പ്രതിസന്ധികളെ ക്രിയാത്മകമായി ഉപയോഗപ്പെടുത്താൻ അദ്ദേഹം പ്രവാസികളെ ഉണർത്തി. പ്രാഗൽഭ്യമുള്ളവരെ വാർത്തെടുക്കുന്നതിലാണ്‌ ഇപ്പോൾ താൻ കൂടുതൽ ശ്രദ്ധിക്കുന്നതെന്നും അദ്ദേഹം പറഞ്ഞു.