കേരള ഉൽപന്നങ്ങളുടെ വൈവിധ്യമൊരുങ്ങും വൻ വിലക്കിഴിവിൽ

ദുബൈ: ഇനി നാട്ടിൽ പോകുേമ്പാൾ വാങ്ങണം എന്നു മനസിൽ കരുതിയിരിക്കുന്ന കേരള ഉൽപന്നങ്ങളുടെ ലിസ്​റ്റ്​ തയ്യാറാക്കിക്കോളൂ. അതൊന്നും വാങ്ങാൻ നാട്ടിൽ പോ​കണ്ട, വെറും ഒരാഴ്​ച മതി അവയെല്ലാം ഷാർജ എക്​സ്​പോ സ​​െൻററിൽ കിട്ടാൻ. ഷാർജ ഭരണാധികാരി ശൈഖ്​ ഡോ. സുൽത്താൻ ബിൻ മുഹമ്മദ്​ അൽ ഖാസിമിയുടെ ആശിർവാദത്തിൽ 25,26,27 തീയതികളിൽ ഗൾഫ്​ മാധ്യമം സംഘടിപ്പിക്കുന്ന കമോൺ കേരള യിൽ തനത്​ കേരള ഉൽപന്നങ്ങളുടെയും  ബ്രാൻറുകളുടെയും സേവനദാതാക്കളുടെയും വിപുലമായ പ്രദർശനവും വിൽപനയുമാണുണ്ടാവുക.  

സുഗന്ധ വ്യഞ്​ജനങ്ങളും കരകൗശല ഉൽപന്നങ്ങളും മുതൽ പാക്കറ്റിലാക്കിയ ഭക്ഷ്യ ഉൽപന്നങ്ങളും കേരള വിഭവങ്ങളും സ്​റ്റാളുകളിൽ നിരനിരയായുണ്ടാവും. നാട്ടിൽ വീടുവാങ്ങുന്നതു സംബന്ധിച്ച നിർദേശങ്ങളും പിന്തുണയും നൽകാൻ പ്രമുഖ ഹൗസിംഗ്​ കമ്പനികളുമെത്തും.  വിനോദ സഞ്ചാരം, ആരോഗ്യ പരിരക്ഷ, ധനകാര്യം തുടങ്ങിയ മേഖലകളിലെ സർക്കാർ, അർധ സർക്കാർ സ്​ഥാപനങ്ങളും വ്യവസായ ഗ്രൂപ്പുകളും ചേർന്ന്​  200 ലേറെ സ്​റ്റാളുകളിലാണ്​ കേരള വിപണി ഒരുക്കുക. കേരള ഉൽപന്നങ്ങൾക്കു പുറമെ ലോകോത്തര ബ്രാൻറുകളുടെ തുണിത്തരങ്ങൾ, പാദരക്ഷകൾ, പെർഫ്യൂമുകൾ, വീട്ടുപകരണങ്ങൾ, അലങ്കാര വസ്​തുക്കൾ, ആഭരണങ്ങൾ എന്നിവയും അതിശയിപ്പിക്കുന്ന വിലക്കിഴിവിൽ കമോൺ കേരള സ്​റ്റാളുകളിൽ ലഭിക്കും.