ജനസാഗരം തീർത്ത്​​ ‘കമോൺ കേരള’ക്ക്​ സമാപനം

ഷാർജ: യു.എ.ഇയുടെ ഏഴ്​ എമിറേറ്റുകളിൽനിന്നും ഒഴുകിയെത്തിയ ജനസാഗരം ചരിത്രം കുറിച്ച സായാഹ്നത്തിൽ ‘കമോൺ കേരള’ ഏഴാം എഡിഷന്​ പ്രൗഢ സമാപനം. മലയാളത്തിന്‍റെ പ്രിയനടൻ മോഹൻലാലിന്‍റെ ആഗോള സ്വീകാര്യതയെ അടയാളപ്പെടുത്തിയ ‘ബിയോണ്ട്​ ദ ബൗണ്ടറീസ്​’ എന്ന ചടങ്ങോടെയാണ്​ മേള അവസാനിച്ചത്​. ജീവിതത്തിലെ അവിസ്മരണീയ ആദരമാണ്​ ‘കമോൺ കേരള’യിൽ ലഭിച്ചതെന്ന്​ മോഹൻലാൽ പറഞ്ഞു.

ഇന്ത്യ ലോകത്തിന്റെ ഹൃദയവും ബഹുസ്വരത ഇന്ത്യയുടെ ആത്മാവുമാണ്. ഇന്ത്യയെ എന്നും നെഞ്ചേറ്റിയവരാണ് അറേബ്യൻ നാടുകൾ. തീർച്ചയായും അഭിനയ ജീവിതത്തിൽ കിട്ടിയ വലിയ ഭാഗ്യമായി ഈ അവസരത്തെ കരുതുന്നു.

യു.എ.ഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയുടെ രക്ഷാകർതൃത്വത്തിൽ ഒരുക്കുന്ന ഈ മേളയിൽ മലയാളത്തെയും ഇന്ത്യയെയും പ്രതിനിധീകരിച്ച് പങ്കെടുക്കാനായതിൽ ഏറെ അഭിമാനമുണ്ട് -മോഹൻലാൽ കൂട്ടിച്ചേർത്തു. ചടങ്ങിൽ മോഹൻലാലിന്​ ‘ഗൾഫ്​ മാധ്യമ’ത്തിന്‍റെ ഉപഹാരം ചീഫ്​ എഡിറ്റർ വി.കെ. ഹംസ അബ്ബാസ് കൈമാറി.

ഷാർജ എക്സ്​പോ സെന്ററിൽ വെള്ളിയാഴ്ച ആരംഭിച്ച മേളയിൽ കഴിഞ്ഞ വർഷങ്ങളിലെ റെക്കോഡുകൾ തകർത്ത ജനക്കൂട്ടമാണ്​ ഇത്തവണ എത്തിച്ചേർന്നത്​. രാവും പകലും വിനോദവും വിജ്ഞാനവും വാണിജ്യവും സംയോജിപ്പിച്ച പ്രദർശനങ്ങളും പരിപാടികളും ആസ്വദിക്കാൻ ജീവിതത്തിന്‍റെ നാനാതുറകളിൽ നിന്നുള്ളവർ എത്തിച്ചേർന്നു.

വിവിധ മത്സരങ്ങളിൽ പ​ങ്കെടുത്ത്​ പകൽ സമയം ചെലവഴിച്ചവർ, പ്രഗൽഭ ഗായകർ പ​ങ്കെടുക്കുന്ന സംഗീതവിരുന്ന്​ ആസ്വദിച്ചാണ്​ മടങ്ങിയത്​​. ‘ലിറ്റിൽ ആർട്ടിസ്റ്റ്​’, ട്വിങ്കിൾ ട്വിങ്കിൾ ലിറ്റിൽ സ്റ്റാർ, സിങ്​ ആൻഡ്​ വിൻ തുടങ്ങിയ മത്സരത്തിന്​ മികച്ച പ്രതികരണമാണ്​ ഇത്തവണ ലഭിച്ചത്​.

ഗൾഫിൽനിന്നും ഇന്ത്യയിൽനിന്നും 200ഓളം സ്ഥാപനങ്ങളുടെ പ്രദർശന സ്റ്റാളുകളാണ്​ മേളയിൽ ഒരുക്കിയത്​. ഞായറാഴ്ച വേദിയിൽ ബിസിനസ്​ പ്രമുഖരെ ആദരിച്ച ഇന്ത്യൻ ബിസിനസ്​ ഐക്കൺ അവാർഡ്​, ബിസിനസ്​ അച്ചീവ്​മെന്‍റ്​ അവാർഡ്​, ​അറേബ്യൻ ലെഗസി അവാർഡ്​ എന്നിവയും സമ്മാനിച്ചു.