കേരളം ഒഴുകിയെത്തി; റെക്കോഡ്​ തിരുത്തി​ 'കമോൺ കേരള'ക്ക്​​ കൊടിയിറക്കം

ഷാർജ: ഇന്ത്യ-യു.എ.ഇ വാണിജ്യ പങ്കാളിത്തത്തിന്‍റെ പുത്തൻ വാതായനങ്ങൾ തുറന്ന് ‘ഗൾഫ്​ മാധ്യമം കമോൺ കേരള’യുടെ അഞ്ചാം എഡിഷന്​​ അവിസ്മരണീയ സമാപനം. രണ്ടര ലക്ഷം പേർ ഒഴുകിയെത്തിയ മുൻ സീസണുകളുടെ സ്വന്തം റെക്കോഡ്​ തിരുത്തിയെഴുതി ഗൾഫിലെ ഏറ്റവും വലിയ ഇന്ത്യൻ മേളയെന്ന പകിട്ടോടെയാണ്​ മഹാമേളക്ക്​ തിരശീല വീണത്​. മൂന്ന്​ ദിനരാത്രങ്ങളിലായി മൂന്ന്​ ലക്ഷത്തോളം പേർ അലകടലായൊഴുകിയ മേള, ഇതിലേറെ പുതുമകളോടെ ആറാം എഡിഷനുമായി വീണ്ടുമെത്തുമെന്ന പ്രഖ്യാപനത്തോടെയാണ്​ കൊടിയിറങ്ങിയത്​.

വാണിജ്യ ചർച്ചകളും പുതിയ കരാറുകളും സാംസ്കാരിക പരിപാടികളും സമ്പന്നമാക്കിയ മേള, ഇരുരാജ്യങ്ങളുടെയും സൗഹൃദം ഊട്ടിയുറപ്പിക്കുന്ന സദസായി മാറി. സമാപന ദിനം നടന്ന ‘ഹാർമോണിയസ്​ കേരള’ സാംസ്​കാരിക പരിപാടിയിൽ നടൻ കുഞ്ചാക്കോ ബോബൻ മുഖ്യാതിഥിയായി. സാംസ്കാരിക പരിപാടികൾക്ക്​ മുമ്പായി യു.എ.ഇയുടെ ​സുസ്ഥിരത വർഷത്തിന്​ ഐക്യദാർഢ്യം പ്രഖ്യാപിച്ച്​ പ്രവാസലോകത്തിന്‍റെ പ്രതിനിധികൾ പ്രതിജ്ഞയെടുത്തു. എം.പിമാരായ കെ. മുരളീധരൻ, ജോൺ ബ്രിട്ടാസ്​ എന്നിവർ മുഖ്യാതിഥികളായി. ഇവർക്കൊപ്പം യു.എ.ഇയിലെ പ്രധാന സംഘടന നേതാക്കൾ അണിനിരന്നു.

ദുരിതകാലത്ത്​ മലയാളി പുലർത്തിയ ഐക്യം വികസനത്തിലും നിലനിർത്തണമെന്ന്​ കെ. മുരളീധരൻ പറഞ്ഞു. വികസനത്തിൽ പ്രവാസികളാണ്​ ഏറ്റവുമധികം സംഭാവന നൽകിയത്​. പ്രതികൂല കാലാവസ്ഥകളെ മറികടന്നാണ്​ യു.എ.ഇ വികസനം കൊണ്ടുവരുന്നത്​. അനുകൂല കാലാവസ്ഥയുള്ള കേരളവും ഈ മാതൃക പിൻപറ്റണമെന്നും ‘ഗൾഫ്​ മാധ്യമം’ നടത്തുന്ന സുസ്ഥിരത ഐക്യദാർഢ്യം ഇതിലേക്കുള്ള വഴികാട്ടിയാകണമെന്നും അദ്ദേഹം കൂട്ടിചേർത്തു.

വികസന കാര്യത്തിൽ പ്രതിപക്ഷവും ഭരണപക്ഷവും തമ്മിൽ പണ്ടത്തേക്കാൾ ഐക്യം കേരളത്തിൽ ഇപ്പോഴുണ്ടെന്ന്​ ജോൺ ബ്രിട്ടാസ്​ എം.പി പറഞ്ഞു. റെയിൽവേയുമായി ബന്ധപ്പെട്ട വിഷയത്തിൽ ഈ ഐക്യം ഉടൻ വ്യക്​തമാകും. ഗൾഫിലേക്ക്​ വരുമ്പോഴാണ്​ നമുക്കും വികസനം വേണ്ടേ എന്ന്​ ആലോചിക്കുന്നത്​. സുസ്ഥിരതക്ക്​ ഐക്യദാർഢ്യം പ്രഖ്യാപിക്കുന്ന ‘മാധ്യമ’ത്തിന്‍റെ പരിപാടിയുടെ ലക്ഷ്യവും വികസനമാണെന്നും അദ്ദേഹം പറഞ്ഞു. യു.എ.ഇയിൽ തുടക്കം കുറിച്ച്​ വൻവിജയം നേടിയ സംരംഭങ്ങളെ ആദരിക്കുന്ന ‘ഗൾഫ്​ മാധ്യമം’-ജലീൽ കാഷ്​ ആൻഡ്​ കാരി ‘ദ പയനിയേഴ്​സ്​ അവാർഡ്’ വിതരണ​ ചടങ്ങും നടന്നു. ഗൾഫ്​ മാധ്യമം ചീഫ്​ എഡിറ്റർ വി.കെ. ഹംസ അബ്ബാസ്​, ജലീൽ ഹോൽഡിങ്​സ്​ എം.ഡി സമീർ കെ. മുഹമ്മദ്​, മാധ്യമം സി.ഇ.ഒ പി.എം. സാലിഹ്​, ഗൾഫ്​ മാധ്യമം-മീഡിയവൺ മിഡിലീസ്റ്റ്​ ഓപറേഷൻസ്​ ഡയറക്ടർ സലീം അമ്പലൻ, എക്സിക്യൂട്ടീവ്​ കമ്മിറ്റി വൈസ്​ ചെയർമാൻ ഡോ. അബ്​ദുസ്സലാം ഒലയാട്ട്​ തുടങ്ങിയവർ സംസാരിച്ചു.