ചൂട്​ വാർത്ത കേട്ട്​ ‘ചൂടാവേണ്ടെന്ന്’​ അധികൃതർ

ദുബൈ: യു.എ.ഇയിൽ അതികഠിനമായ ചൂടുണ്ടാകുമെന്ന വിധത്തിൽ സാമൂഹ്യ മാധ്യമങ്ങളിൽ പരക്കുന്ന വാർത്തകൾ വിശ്വസിക്കേ​ണ്ടെന്ന്​ അധികൃതർ. രാജ്യത്ത്​ ഉഷ്​ണ തരംഗം ഉണ്ടാകുമെന്ന രീതിയിൽ വാട്​സാപ്പിലും മറ്റുമാണ്​ ഉൗഹാപോഹങ്ങൾ പരക്കുന്നത്​. ചൂട്​ 50 ഡിഗ്രിയും കടക്കുമെന്നും വാഹനങ്ങൾ ശ്രദ്ധിച്ച്​ ഉപയോഗിക്കണമെന്നുമാണ്​ സന്ദേശങ്ങളിലുള്ളത്​. 

ഇത്​ സത്യവിരുദ്ധമാണെന്ന്​ ദേശീയ കാലാവസ്​ഥാ നിരീക്ഷണ കേന്ദ്രം ഉദ്യോഗസ്​ഥർ ചൂണ്ടിക്കാട്ടുന്നു. ചൂട്​ ഇനിയും വലിയ തോതിൽ വർധിക്കാൻ സാധ്യതയില്ലെന്നാണ്​ അവരുടെ നിഗമനം. ഇൗ വർഷത്തെ ഏറ്റവും കൂടിയ ചൂട്​ ഇൗ മാസം ആദ്യം രേഖപ്പെടുത്തിക്കഴിഞ്ഞു. 50.8 ഡിഗ്രിയായിരുന്നു ഇത്​. അന്തരീക്ഷത്തിൽ ചൂട്​ കൂടുന്നത്​ വാഹനത്തെ ബാധിക്കില്ലെന്നും ശാസ്​ത്രജ്ഞർ പറയുന്നു. ചൂട്​ കൂടുന്നതിനാൽ വൈകുന്നേരങ്ങളിൽ മാത്രമെ ഇന്ധനം നിറക്കാവൂ എന്നും ടാങ്ക്​ നിറയെ ഇന്ധനം നിറക്കരുതെന്നും പ്രചാരണമുണ്ടായിരുന്നു. 

എന്നാൽ, കൃത്യമായ ഇടവേളകളിൽ സർവീസ്​ ചെയ്യുകയും ടയറുകൾ സുരക്ഷിതമാണെന്ന്​ ഉറപ്പാക്കുകയും ചെയ്​താൽ മതിയാകും. നിലവാരമുള്ള ടയറുകൾ മാത്രമെ ഉപയോഗിക്കാവൂ. വായുമർദം നിർദേശിക്കപ്പെട്ട അളവിൽ കുറയരുത്​. മാസത്തിൽ ഒരിക്കലെങ്കിലും ഇത്​ പരിശോധിക്കണം. വായുവിന്​പകരം നൈട്രജൻ നിറക്കുന്നത്​ നല്ലതാണ്​. വാഹന നിർമാതാക്കൾ നിർദേശിച്ചിരിക്കുന്ന അളവിലുള്ള ടയറുകൾ മാത്രമേ ഉപയോഗിക്കാവൂ എന്നും നിർദേശിച്ചിട്ടുണ്ട്​.