അലമാരകൾ ‘വൃത്തിയാക്കാൻ’ ഡി.എച്ച്​.എയുടെ ആഹ്വാനം 

ദുബൈ: വീടുകളിൽ ഉപയോഗിക്കാതെ കൂട്ടിയിട്ടിരിക്കുന്ന മരുന്നുകൾ ശേഖരിക്കാൻ ദുബൈ ഹെൽത്ത്​ അതോറിറ്റിയുടെ (ഡി.എച്ച്​.എ) പദ്ധതി. ആവശ്യം കഴിഞ്ഞതും ഉപയോഗശൂന്യമാവാത്തതുമായ മരുന്നുകൾ ശേഖരിച്ച്​ ഡി.എച്ച്​.എയുടെ ഫാർമസികളിൽ നൽകുന്നതാണ്​ പദ്ധതി. കാലാവധി കഴിഞ്ഞ ശേഷം വലിച്ചെറിയുന്ന മരുന്നുകൾ ടൺ കണക്കിനാണ്​ ഒാരോ വർഷവും മാലിന്യകൂമ്പാരങ്ങളിൽ എത്തുന്നതെന്ന്​ ഡി.എച്ച്​.എ. അധികൃതർ പറയുന്നു. 
ഇവ പാവങ്ങൾക്ക്​ ലഭ്യമാക്കുകയാണ്​ ലക്ഷ്യം. ‘അലമാരകൾ വ​​ൃത്തിയാക്കൂ’ എന്ന പേരിലാണ്​ ഇത്​ സംബന്ധിച്ച പ്രചാരണം നടത്തുന്നത്​. 2011 ലാണ്​ ഡി.എച്ച്​.എ. ഇൗ പദ്ധതിക്ക്​ തുടക്കമിട്ടത്​.

മിച്ചമുള്ള മരുന്നുകൾ ശേഖരിക്കാൻ നഗരത്തിലുടനീളമുള്ള ഡി.എച്ച്​.എ. ഫാർമസികളിൽ സൗകര്യവും ഏർപ്പെടുത്തിയിരുന്നു. എന്നാൽ ആദ്യത്തെ വർഷങ്ങളിൽ കാര്യമായ ചലനമുണ്ടാക്കാൻ പദ്ധതിക്കായില്ല. എന്നാൽ 2016 ലും 2017 ലും സ്​ഥിതി മാറി. കാലാവധി കഴിഞ്ഞ 10 ടൺ മരുന്ന്​ ഇൗ കാലയളവിൽ ഡി.എച്ച്​.എക്ക്​ ലഭിച്ചു. ഉപയോഗ യോഗ്യമായ രണ്ട്​ ടൺ മരുന്നുകളും കിട്ടി. ഇത്​ ആവശ്യക്കാർക്ക്​ എത്തിച്ചു നൽകാൻ കഴിഞ്ഞുവെന്ന്​ ഡി.എച്ച്​.എ. ഫാർമസി വിഭാഗം ഡയറക്​ടർ ഡോ. അലി സെയ്​ദ്​ പറഞ്ഞു. 

കാലഹരണപ്പെട്ട മരുന്നുകൾ സുരക്ഷിതവും ശാസ്​ത്രീയവുമായ രീതിയിൽ നശിപ്പിക്കാനും നല്ല മരുന്നുകൾ പാവങ്ങൾക്ക്​ നൽകാനും പദ്ധതിയിലൂടെ സാധിച്ചുവെന്ന്​ അദ്ദേഹം പറഞ്ഞു. മാത്രമല്ല, ഒാരോ മാസവും അഞ്ച്​ ലക്ഷം ദിർഹത്തി​​​െൻറ മരുന്ന്​ പാവങ്ങൾക്ക്​ നൽകാൻ ഡി.എച്ച്​.എക്ക്​ കഴിയുന്നുണ്ട്​. കാലാവധി കഴിഞ്ഞ മരുന്ന്​ ശരിയായ വിധം നശിപ്പിച്ചില്ലെങ്കിൽ ഗുരുതരമായ ആരോഗ്യ, പരിസ്​ഥിതി പ്രശ്​നങ്ങൾ സ​ൃഷ്​ടിക്കും. മണ്ണും ജലവും മലിനമാകും. അതിനാൽ മരുന്നുകൾ ഡി.എച്ച്​.എ. ഫാർമസികളിൽ തിരിച്ചേൽപ്പിക്കുകയാണ്​ നല്ലതെന്നും അദ്ദേഹം കൂട്ടിച്ചേർത്തു. 16 ഡി.എച്ച്​.എ. ആരോഗ്യ കേന്ദ്രങ്ങളിലും നാല്​ ആശുപത്രികളിലുമുള്ള ഫാർമസികളിൽ ഇതിനുള്ള സൗകര്യമുണ്ട്​.