കാർഗോ പ്രതിസന്ധി തുടരുന്നു;  ഉടമകൾ കോടതിയിൽ

ദുബൈ: ഡോർ ടു ഡോർ കാർഗോ സേവന രംഗത്തെ പ്രതിസന്ധി തുടരുന്നതിനിടെ പ്രശ്​ന പരിഹാരം തേടി കാർഗോ കമ്പനികൾ ഡൽഹി ഹൈക്കോടതിയെ സമീപിച്ചു. പ്രവാസികൾക്ക്​ 20,000 രൂപയുടെ വരെ വസ്​തുക്കൾ നികുതിയില്ലാതെ നാട്ടിലേക്കയക്കാൻ 24 വർഷം മുമ്പ്​​ കേന്ദ്ര സർക്കാർ അനുവദിച്ചിരുന്ന ആനുകൂല്യമാണ്​ ജൂൺ 30 ന്​ അർധരാത്രി മുന്നറിയിപ്പില്ലാതെ പിൻവലിച്ചത്​. ആനുകൂല്യമാണ്​ ഇല്ലാതായത്​. ഇനി മുതൽ 10 ശതമാനം അടിസ്​ഥാന കസ്​റ്റംസ്​ തീരുവ, 28 ശതമാനം സംയോജിത ചരക്കു സേവന നികുതി, മൂന്നു ശതമാനം സെസ്​ എന്നിങ്ങനെ മൊത്തം 41 ശതമാനം നികുതിയടക്കണമെന്നാണ്​ ഉത്തരവ്​.

ഇതിനെതിരെ ഇൗ രംഗത്തെ ഗൾഫിലെ പ്രമുഖ സ്​ഥാപനങ്ങളായ റജബ്​ കാർഗോയും സീബ്രീസ്​ കാർഗോയുമാണ്​ ഡൽഹി ഹൈക്കോടതിയെ  സമീപിച്ചത്​. ഇവരുടെ ഹരജി കോടതി വ്യാഴാഴ്​ച ഫയലിൽ സ്വീകരിച്ചു. കാർഗോ സ്​ഥാപനങ്ങളുടെ കൂട്ടായ്​മയായ ഇൻറർനാഷണൽ കൊറിയർ ഏജൻറ്​സ്​ വെൽഫയർ അസോസിയേഷനും വരും ദിവസം ഹരജി നൽകും. 
​മുന്നറിയിപ്പില്ലാതെ നികുതി ഏർപ്പെടുത്തിയത്​ വഴി ഇന്ത്യയിലെ വിവിധ വിമാനത്താവളങ്ങളിൽ ഒരാഴ്​ചയായി കെട്ടിക്കിടക്കുന്ന ടൺകണക്കിന്​ പാർസലുകൾ വിട്ടുകിട്ടണമെന്നും  പ്രവാസികൾക്ക്​ 1993 മുതൽ അനുവദിച്ചുവന്ന ആനുകൂല്യം എടുത്തുകളയരുതെന്നുമാണ്​ ഹരജിയിൽ ആവശ്യപ്പെടുന്നത്​. 

നികുതി നിർദേശം വരുന്നതിന്​ മുമ്പയച്ച പാർസലുകളാണ്​ വിമാനത്താവളങ്ങളിൽ ക്ലിയറൻസ്​ ലഭിക്കാതെ കിടക്കുന്നത്​. 1993 സെപ്​റ്റംബർ 16ന്​ സെൻട്രൽ ബോർഡ്​ ഒാഫ്​ എക്​സൈസ്​ ആൻറ്​ കസ്​റ്റംസി​​​െൻറ 171/1993 ഉത്തരവ്​ വഴിയാണ്​ ഇത്രയും കാലം പ്രവാസികൾക്ക്​ ഇൗ ആനുകൂല്യം ലഭിച്ചിരുന്നത്​. 5,000 രൂപയുടെ സമ്മാനങ്ങൾ​ നികുതിയൊന്നുമില്ലാതെ നാട്ടിലേക്കയക്കാനാണ്​ ആദ്യം അനുമതി ലഭിച്ചത്​. 1998ൽ ഇൗ പരിധി 10,000 രൂപയായും കഴിഞ്ഞവർഷം 20,000 രൂപയായും ഉയർത്തി. ഇതാണ്​ ചരക്കു സേവന നികുതി ​പ്രാബല്യത്തിൽ വന്ന ഇക്കഴിഞ്ഞ ജൂൺ 30 ന്​  ​പിൻവലിച്ചത്​. ഇത്​ സാധാരണക്കാരായ പ്രവാസികളെയാണ്​ ഏറെ പ്രതികൂലമായി ബാധിച്ചത്​. വീട്ടിലേക്ക്​ ആവശ്യമായ തുണിത്തരങ്ങളും ഭക്ഷ്യവസ്​തുക്കളും കളിപ്പാട്ടങ്ങളുമെല്ലാമാണ്​ ഇങ്ങനെ അയച്ചിരുന്നത്​.

 പ്രത്യേകിച്ച്​ എല്ലാ വർഷവും നാട്ടിൽ പോകാൻ സാധിക്കാത്തവർ. വിമാനത്തിൽ യാ​ത്രക്കൊപ്പം കൊണ്ടാവുന്ന ലഗേജിന്​ കർശന  ഭാര നിയന്ത്രണമുള്ളതും പ്രവാസികളിൽ വലിയൊരു വിഭാഗത്തെ ഡോർ ടു ഡോർ കാർഗോ സേവനത്തെ ആശ്രയിക്കാൻ നിർബന്ധിതരാക്കുന്നു. നാട്ടിലേക്കുള്ള യാത്രക്ക്​ മുന്നോടിയായി അധികമുള്ള ലഗേജ്​ കാർഗോയായി അയക്കുകയായിരുന്നു പതിവ്​. കിലോവിന്​ 10^12 ദിർഹം തോതിൽ ​ നൽകിയാൽ പരമാവധി രണ്ടാഴ്​ചകൊണ്ട്​ കേരളത്തിലെവിടെയും വീടുകളിൽ സാധനങ്ങൾ എത്തുമായിരുന്നു. 
ഗൾഫി​ലും ഇന്ത്യയിലുമായി നൂറുകണക്കിന്​ കാർഗോ സ്​ഥാപനങ്ങളാണ്​ പ്രവർത്തിക്കുന്നത്​. ദിവസം 500 ടൺ സാധനങ്ങളാണ്​ ഇന്ത്യയിൽ എത്തിയിരുന്നത്​. ഇത്​ ഒരാഴ്​ചയായി സ്​തംഭിച്ചിരിക്കുകയാണ്​. രണ്ടു ലക്ഷത്തോളം പേർ ഇൗ മേഖലയിൽ പണിയെടുക്കുന്നുണ്ടെന്നാണ്​ അസോസിയേഷൻ പറയുന്നത്​. ഇവരിൽ ഭൂരിഭാഗവും മലയാളികളാണ്​.