കെയർ കേരള: പ്രവാസികളുടെ ആദ്യഘട്ട സഹായം ഉടൻ

ദുബൈ: കോവിഡിൽ ഉലയുന്ന ജന്മനാടിനുള്ള​ പ്രവാസികളുടെ സഹായം ഉടൻ നാട്ടിലെത്തിക്കും.കേരള സർക്കാറി​െൻറ കെയർ കേരള പദ്ധതി പ്രകാരമുള്ള ആദ്യ സഹായം ഈയാഴ്​ച നാട്ടിലയക്കാനാണ്​ ഒരുങ്ങുന്നത്​. എമിറേറ്റ്​സി​െൻറ വിമാനത്തിൽ ദുബൈയിൽ നിന്ന്​ തിരുവനന്തപുരം വിമാനത്താവളത്തിലേക്കാണ്​ എത്തിക്കുന്നത്​. കേരള സർക്കാറി​െൻറ നേതൃത്വത്തിൽ ഇത്​ അർഹരിലേക്കും വിവിധ മെഡിക്കൽ സ്​ഥാപനങ്ങളിലേക്കും എത്തിക്കും. 1900 ഓക്​സി മീറ്റർ, 100 ഓക്​സിജൻ സിലിണ്ടർ, ഒരു വെൻറിലേറ്റർ, 40 ഓക്​സിജൻ കോൺസൺട്രേറ്റർ എന്നിവയാണ്​ ആദ്യഘട്ടത്തിൽ തയാറാക്കിയത്​. അടുത്ത ഘട്ടത്തിലേക്കുള്ള 70 ശതമാനവും ശേഖരിച്ചിട്ടു​ണ്ട്​. ഇത്​ അടുത്തയാഴ്​ച നാട്ടിലെത്തിക്കും.

മുഖ്യമന്ത്രി പിണറായി വിജയ​െൻറ നി​ർദേശപ്രകാരമാണ്​ നോർക്കയുടെ നേതൃത്വത്തിൽ പ്രവാസി സംഘടനകളുടെ സഹായം ശേഖരിച്ചത്​.സംഘടനകൾ, വിവിധ വ്യക്​തികൾ മുഖേന ശേഖരിച്ച ഉപകരണങ്ങളാണ്​ കെയർഫോർ കേരള വഴി നാട്ടിലെത്തിക്കുന്നത്​. ആസ്​റ്റർ വളൻറിയേഴ്​സ്​ ഗ്രൂപ്​ വഴിയാണ്​ ഉപകരണങ്ങൾ ശേഖരിച്ചത്​. സംഘടനകൾ വഴി എത്തിച്ച സാധനങ്ങൾ ആസ്​റ്ററി​െൻറ വെയർഹൗസിലെത്തിച്ച്​ ക്രോഡീകരിച്ച ശേഷമാണ്​ നാട്ടിലേക്കയക്കുന്നത്​. ​

ഇന്ത്യയിലേക്കുള്ള മെഡിക്കൽ ഉപകരണങ്ങൾ കാർഗോ നിരക്ക്​ ഈടാക്കാതെ നാട്ടിലെത്തിക്കുമെന്ന്​ എമിറേറ്റ്​സ്​ എയർലൈൻസ്​ അറിയിച്ചിരുന്നു. അതിനാലാണ്​ ഉപകരണങ്ങൾ എമിറേറ്റ്​സ്​ വഴി അയക്കുന്നത്​. ​ഇന്ത്യയിൽ ഇറക്കുമതി ചുങ്കം ഒഴിവാക്കുമെന്ന്​ കേന്ദ്ര സർക്കാറും അറിയിച്ചിരുന്നു.

കെ.എം.സി.സി, ഓർമ, അക്കാഫ്​, വേൾഡ്​ മലയാളി കൗൺസിൽ, റൈസ്​ ​ഓഫ്​ ഹോപ്​ തുടങ്ങി ഭൂരിപക്ഷം സംഘടനകളും ദൗത്യവുമായി സഹകരിക്കുന്നുണ്ട്​. എല്ലാ അസോസിയേഷനുകളിൽ നിന്നും സംഘടനകളിൽ നിന്നും രാഷ്​ട്രീയ ഭേദമന്യേ മികച്ച സഹകരണമാണ്​ ലഭിക്കുന്നതെന്നും പ്രവാസികളുടെ സഹായം ഉടൻ അർഹരിലേക്കെത്തുമെന്നും കെയർ ഫോർ കേരള പ്രതിനിധി ബിന്ദു നായർ പറഞ്ഞു.

എങ്ങനെ നൽകാം സഹായം:

പ്രവാസലോകത്തെ സഹായം ക്രോഡീകരിക്കാൻ നോർക്ക റൂട്​സിനെയാണ്​ സർക്കാർ ചുമതലപ്പെടുത്തിയത്​. ഇതി​െൻറ ഭാഗമായി നോർക്ക ​റൂട്സ്​​ കഴിഞ്ഞ ദിവസം എല്ലാ സാമൂഹിക, സാംസ്​കാരിക, രാഷ്​ട്രീയ സംഘടനകൾക്കും കത്തയച്ചിരുന്നു. ഇവർ വഴിയാണ്​ സഹായം എത്തിക്കുന്നത്​.

വ്യക്​തിപരമായി നേരിട്ട്​ സഹായം എത്തിക്കുന്നവരുമുണ്ട്​. ഓക്​സിജൻ യൂനിറ്റ്​, ഓക്​സിജൻ കണ്ടെയ്​നർ, ഐ.സി.യു ഉപകരണങ്ങൾ, വെൻറിലേറ്റർ, പൾസ്​ ഓക്​സി മീറ്റർ, മരുന്നുകൾ തുടങ്ങിയവയാണ്​ ശേഖരിക്കുന്നത്​.

എല്ലാ ജി.സി.സിയിലും ഇത്​ നടപ്പാക്കുന്നുണ്ട്​. സഹായം നൽകാൻ താൽപര്യമുള്ളവർ ഇതിനായി പ്രവർത്തിക്കുന്ന പ്രവാസി സംഘടനകളെയോ കെയർഫോർ കേരള അധികൃതരെയോ ബന്ധപ്പെടണം. 056 447 1522 എന്ന നമ്പറിലും careforkerala.uae@gmail.com എന്ന ഇ–മെയിൽ വിലാസത്തിലും വിവരങ്ങൾ അറിയാം.