വൃത്തിഹീനമായ കാറുകൾ വഴിയിൽ തള്ളുന്നതിനെതിരെ ദുബൈ നഗരസഭ

ദുബൈ: നാളുകളോളം കഴ​ുകുകയും തുടക്കുകയും ചെയ്യാതെ കാറുകൾ നഗരത്തിലെ തെരുവുകളിൽ നിർത്തിയിട്ട്​ പോകുന്നവരെ കാത്ത്​ ദുബൈ നഗരസഭയുടെ നടപടി വരുന്നു. ഇത്തരത്തിൽ കാറുകൾ അശ്രദ്ധമായി തള്ളുന്നതിനെതിരെ നഗരസഭയുടെ മാലിന്യ നിയന്ത്രണ വിഭാഗം ബോധവത്​കരണവും പരിശോധനയും ശക്​തമാക്കിയിട്ടുണ്ട്​.

37347 കാറുടമകൾക്ക്​ ഇതു സംബന്ധിച്ച്​ മുന്നറിയിപ്പ്​ നൽകിയിരുന്നു. എന്നാൽ അതു പാലിക്കാൻ കൂട്ടാക്കാഞ്ഞതിനെ തുടർന്ന്​ 4930 കാറുകൾ നഗരസഭാ ഉദ്യോഗസ്​ഥർ നീക്കം ചെയ്​തു.കാറുകൾ കണ്ടുകെട്ടിയാൽ വീണ്ടെടുക്കാൻ പിഴയും മറ്റു ചാർജുകളുമുൾപ്പെടെ 1381ദിർഹം നൽകേണ്ടി വരും. ആറു മാസം കഴിഞ്ഞും വീണ്ടെടുക്കാത്തവ ലേലം ചെയ്യും. വൃത്തിയില്ലാത്ത കാറുകൾ പൊതു റോഡുകളിൽ ഉപേക്ഷിച്ചതായി കണ്ടാൽ നഗരസഭ ഉടനടി നീക്കം ചെയ്യും. നഗരത്തി​​െൻറ സൗന്ദര്യത്തിന്​ കോട്ടവരുത്തുകയും സുരക്ഷാ പ്രശ്​നങ്ങൾ സൃഷ്​ടിക്കുകയും ചെയ്യുന്നതിനാലാണിത്​. ഇത്തരം വാഹനങ്ങളിൽ ​ക്രിമിനലുകൾ ഒളിച്ചു പാർക്കാനും തെരുവുമൃഗങ്ങൾ താവളമാക്കാനും സാധ്യതയുണ്ട്​. 

കാറുകൾ നീക്കം ചെയ്യുന്നതിന്​ രണ്ട്​ സ്വകാര്യ കമ്പനികളെ ചുമതലപ്പെടുത്തിയിട്ടുണ്ട്​്​്​. നഗരസഭയുടെ മുന്നറിയിപ്പ്​ കാലാവധിക്കുശേഷവും വൃത്തിഹീനമായ കാറുകൾ പൊതുസ്​ഥലങ്ങളിൽ കണ്ടാൽ കമ്പനി പ്രതിനിധികൾ എത്തി നീക്കം ചെയ്യും. സ്വകാര്യ പാർക്കിങ്​ സ്​ഥലങ്ങളിൽ അനുമതിയില്ലാതെ നിർത്തിയിടുന്ന വാഹനങ്ങൾക്കെതിരെയും നടപടിയുണ്ടാവും.വാഹനങ്ങളുടെ വായ്​പയും പിഴയും അടക്കാത്ത പ്രവാസികളാണ്​ പലപ്പോഴും കാറുകൾ ഉപേക്ഷിച്ച്​ പോകുന്നതെന്നും അധികൃതർ ചൂണ്ടിക്കാട്ടി.