രണ്ടു​ വർഷത്തിനപ്പുറം മിലാനിൽനിന്ന്​ വിളിയെത്തി; ആ പാസ്​പോർട്ടുകൾ ഇവിടെയുണ്ട്...

ദുബൈ: രണ്ടാഴ്​ച മുമ്പാണ്​ ആലപ്പുഴ ചെങ്ങന്നൂരുള്ള ലൈല എബ്രഹാമി​െൻറ ഫോണിലേക്ക്​ പരിചയമില്ലാത്ത നമ്പറിൽനിന്ന്​ ഫോൺവിളി എത്തിയത്. ഇൻറർനാഷനൽ ​കാൾ ആയതിനാൽ തട്ടിപ്പ്​ സാധ്യത മുന്നിൽക്കണ്ട്​ ഫോൺ എടുത്തില്ല. അതോടെ വിളി വാട്​സ്​ആപ്പിലായി. കോഡ്​ പരിശോധി​ച്ചപ്പോൾ ഇറ്റലിയിലെ മിലാനിൽ നിന്നാണ്​ വിളിക്കുന്നതെന്ന്​ മനസ്സിലായി. ഇതിനു​ പിന്നാലെ വാട്​സ്​ആപ്പിൽ ഇറ്റാലിയൻ നമ്പറിൽ നിന്ന്​ സന്ദേശവുമെത്തി 'നിങ്ങളുടെ പാസ്​പോർട്ടുകൾ അടങ്ങിയ ബാഗ്​ ഇവിടെ കിട്ടിയിട്ടുണ്ട്​. എന്ത്​ ചെയ്യണം'...2019ൽ മിലാൻ യാത്രക്കിടെ നഷ്​ടപ്പെട്ട ബാഗും പാസ്​പോർട്ടും രണ്ടു​ വർഷത്തിനു​ശേഷം തിരിച്ചുകിട്ടിയ കഥ ദുബൈയിലെ മാധ്യമ പ്രവർത്തക സ്​നേഹ മേയ്​ ഫ്രാൻസിസ്​ പറയുന്നു:

2019 ജൂലൈയിലാണ് ചെറിയൊരു ട്രിപ്പിനായി​ മിലാനിലേക്ക്​ വിമാനം കയറിയത്​. ഭർത്താവ്​ മാർകോസ്​ എബ്രഹാമിനും മകൻ റഫായേലിനുമൊപ്പമായിരുന്നു യാത്ര. അമേരിക്കയിൽ നിന്ന്​ ഭർത്താവി​െൻറ സഹോദരനും കുടുംബവും മിലാനിൽ എത്തിയിരുന്നു. ചെറിയൊരു കുടുംബ സംഗമവും ഇറ്റലി ട്രിപ്പുമായിരുന്നു ലക്ഷ്യം. രണ്ടു​ വിമാനത്താവളങ്ങളിലായാണ്​ വിമാനം ഇറങ്ങിയത്​. മറ്റൊരു കഫെയിൽ ഒരുമിക്കാം എന്നായിരുന്നു തീരുമാനം. കഫെയിലെത്തി ഭക്ഷണം കഴിക്കുന്നതിനിടെ ഭർത്താവ്​ പവർ ബാങ്കിനായി ബാഗ്​ അന്വേഷിച്ചു. ​അപ്പോഴാണ്​ കൈയിലുണ്ടായിരുന്ന ബാഗ്​ പാക്​ നഷ്​ടമായ വിവരം അറിയുന്നത്​. ബാഗിൽ പണം ഉണ്ടായിരുന്നില്ല. പക്ഷേ, അതിനേക്കാൾ വിലപ്പെട്ട മറ്റൊന്നുണ്ടായിരുന്നു, ഞങ്ങളുടെ മൂന്ന്​ പേരുടെയും പാസ്​പോർട്ട്​. ഒരുമാസം മുമ്പ്​​ സ്വിറ്റ്​സർലൻഡിലെത്തിയ സുഹൃത്തി​െൻറ പാസ്​പോർട്ട്​ നഷ്​ടമായതിനെ തുടർന്ന്​ ഒരുമാസത്തോളം അവിടെ കുടുങ്ങിയ കഥ മനസ്സിലൂടെ മിന്നിമാഞ്ഞു. ഉടനെയൊന്നും മടങ്ങാനാവില്ലെന്ന ആധിയിൽ റഫായേലി​െൻറ കരച്ചിലിന്​ ശക്​തി ഏറി വന്നു. അവ​െൻറ ഷൂസും ഐ പാഡുമെല്ലാം ആ ബാഗിലായിരുന്നു.

അവിടെയുണ്ടായിരുന്ന സെക്യൂരിറ്റി ഉദ്യോഗസ്​ഥരോട്​ കാര്യം പറഞ്ഞെങ്കിലും പൊലീസിൽ പരാതി നൽകാതെ തങ്ങൾക്ക്​ ഒന്നും ചെയ്യാൻ കഴിയില്ലെന്ന്​ പറഞ്ഞ്​ കൈമലർത്തി. സി.സി ടി.വി പരിശോധിക്കാൻ പോലും അവർ തയാറായില്ല. ഒടുവിൽ പൊലീസ്​ സ്​റ്റേഷനിലെത്തി. പൊലീസുകാർക്ക്​ ഇംഗ്ലീഷ്​ അറിയാത്തതിനാൽ ഭാഷയും പ്രശ്​നമായി. എങ്കിലും ഒരുവിധത്തിൽ അവരെ പറഞ്ഞ്​ മനസ്സിലാക്കി പരാതി നൽകി. അടുത്ത ലക്ഷ്യം ഇന്ത്യൻ കോൺസുലേറ്റാണ്​. അവിടെയെത്തി എമർജൻസി പാസ്​പോർട്ടിന്​ അപേക്ഷ നൽകണം. പക്ഷേ, അപ്പോഴേക്കും സമയം കഴിഞ്ഞിരുന്നു. അടുത്ത ദിവസം ഇന്ത്യൻ കോൺസുലേറ്റിലും യു.എ.ഇ എംബസിയിലും വിളിച്ചു. ഒരു ദിവസം കൂടി കാത്തിരിക്കൂ, ബാഗ്​ ചിലപ്പോൾ തിരികെ കിട്ടിയേക്കാം എന്നായിരുന്നു അവരുടെ മറുപടി. മനസ്സില്ലാ മനസ്സോടെ രണ്ടാം ദിവസം വെനീസിലേക്ക്​ കറങ്ങാൻ പോയി. ഒമ്പതു ദിവസത്തെ ട്രിപ്പ്​ അഞ്ച്​ ദിവസമായി ചുരുക്കാൻ തീരുമാനിച്ചു.

എങ്ങനെയെങ്കിലും നാട്ടിൽ തിരിച്ചെത്തണമെന്ന്​ മാത്രമേ മനസ്സിലുണ്ടായിരുന്നുള്ളൂ. അഞ്ചു ദിവസത്തെ ഇറ്റാലിയൻ ദിനങ്ങളിൽ മൂന്നു​ ദിവസവും എംബസിയിലും കോൺസുലേറ്റിലും പൊലീസ്​ സ്​റ്റേഷനിലുമായിരുന്നു. ഒടുവിൽ കേരളത്തിലേക്ക്​ എമർജൻസി പാസ്​പോർട്ട്​ ലഭിച്ചു. തിരിച്ചുപോകേണ്ടത്​ ദുബൈയിലേക്കായിരുന്നെങ്കിലും പാസ്​പോർട്ട്​ എടുത്തത്​ കേരളത്തിൽ നിന്നായിരുന്നതിനാൽ കൊച്ചിയിലേക്കാണ്​ അനുമതി ലഭിച്ചത്​. കിട്ടിയത്​ ഭാഗ്യം എന്ന്​ കരുതി കൊച്ചിയി​േലക്ക്​ തിരിച്ചു. കേരളത്തിലെത്തി 15 ദിവസം തങ്ങിയശേഷമാണ്​ പുതിയ പാസ്​പോർട്ട്​ ലഭിച്ചത്​.

പാളിപ്പോയ ഇറ്റാലിയൻ യാത്ര മറക്കാൻ ശ്രമിക്കുന്നതിനിടെയാണ്​ രണ്ടാഴ്​ച മുമ്പ്​​ ഭർത്താവി​െൻറ അമ്മ ലൈല എബ്രഹാമി​െൻറ ഫോണിലേക്ക്​ ഇറ്റലിയിൽ നിന്ന്​ ഫോൺ വന്നത്​. ബാഗ്​ ഇവിടെ കിട്ടിയിട്ടുണ്ടെന്നും എന്തുചെയ്യണമെന്നുമായിരുന്നു ചോദ്യം. ഞങ്ങൾ അവരെ തിരിച്ചുവിളിച്ചു. 2019 ആഗസ്​റ്റിൽ തന്നെ നിങ്ങളുടെ ബാഗ്​ തിരികെ കിട്ടിയിരുന്നെന്നും എന്നാൽ, പാസ്​പോർട്ട്​ റദ്ദാക്കിയെന്ന്​ കാണിച്ചതിനാൽ അറിയിക്കാതിരുന്നതാണെന്നും ഇറ്റാലിയൻ ഉദ്യോഗസ്​ഥർ പറഞ്ഞു. ഐ പാഡ്​ ഉൾപ്പെടെയുള്ള വിലപ്പെട്ട വസ്​തുക്കളുള്ളതിനാലാണ്​ ഇപ്പോൾ വിളിച്ചതെന്നും അവർ അറിയിച്ചു. ഒടുവിൽ നാലു​ ദിവസം മുമ്പ്​​ ആ ബാഗ്​ ഞങ്ങളെ തേടി കൊറിയറിൽ എത്തി. റഫായേലി​െൻറ കുഞ്ഞു ഷൂസും ഞങ്ങളുടെ യാത്ര കുളമാക്കിയ പാസ്​പോർട്ടും ഐ പോഡുമെല്ലാം ഒരു കോട്ടവും തട്ടാതെ ബാഗിനുള്ളിലുണ്ടായിരുന്നു. ആഘോഷമായ അൺബോക്​സിങ്ങിലൂടെയാണ്​ ഞങ്ങൾ ആ ബാഗ്​ തുറന്നത്​.