എക്​സ്​പോക്ക്​ ആദ്യം ടിക്കറ്റെടുക്കൂ; ഉദ്​ഘാടന ചടങ്ങിൽ 'വി.ഐ.പി'യാകാം

ദുബൈ: ആഗസ്​റ്റ്​14ന്​ മുമ്പ്​ ടിക്കറ്റെടുക്കുന്നവരിൽനിന്ന്​ തിരഞ്ഞെടുക്കപ്പെടുന്ന 50 പേർക്ക്​ പ്രമുഖർ പ​ങ്കെടുക്കുന്ന എക്​സ്​പോ 2020യുടെ ഉദ്​ഘാടനചടങ്ങിൽ പ​ങ്കെടുക്കാം.

ലോകത്തി‍െൻറ വിവിധ ഭാഗങ്ങളിൽ നിന്ന്​ താരപ്രമുഖർ പ​ങ്കെടുക്കുന്ന ചടങ്ങായിരിക്കും ഇത്​. നിലവിൽ ടിക്കറ്റ്​ വിൽപന ആരംഭിച്ചിട്ടുണ്ട്​. സീസൺ പാസ്​ അല്ലെങ്കിൽ ഫാമിലി പാക്കേജ്​ ലഭിക്കുന്നവരിൽ നിന്ന്​ നറുക്കിട്ടാണ്​ വിജയികളെ തിരഞ്ഞെടുക്കുക. ആറുമാസത്തെ പ്രവേശനത്തിനുള്ള സീസൺ പാസിന്​ 495 ദിർഹമും ഫാമിലി പാക്കേജിന്​ 950 ദിർഹമുമാണ്​ വില. എക്​സ്​പോയുടെ സമൂഹ മാധ്യമ അക്കൗണ്ടുകൾ വഴി വിജയികളെ സെപ്​റ്റംബർ ആദ്യവാരത്തിൽ പ്രഖ്യാപിക്കും.

വിജയികൾക്ക്​ പ്രത്യേക ക്ഷണവും ലഭിക്കും. യു.എ.ഇ താമസക്കാരായ 18 വയസ്സ്​ ​തികഞ്ഞവർക്കാണ്​ മത്സരത്തി​െൻറ ഭാഗമാകാൻ അവസരം. എക്‌സ്‌പോയുടെ തുടക്കം ഗംഭീരമായ കാഴ്​ചാനുഭവമാക്കാനുള്ള ശ്രമത്തിലാണ്​ അധികൃതർ.

അതിശയകരമായ വിഷ്വലുകളും ലോകോത്തര ഇഫക്​ടുകളും നിറഞ്ഞ ചടങ്ങ്​ നഗരിയുടെ ഹൃദയഭാഗമായ അൽ വാസൽ പ്ലാസയിലായിരിക്കും.

അറബ്​ ലോകത്തെ ഏറ്റവും വലിയ മേളയുടെ ചരിത്രപരമായ ഉദ്​ഘാടന ചടങ്ങിൽ പ​ങ്കെടുക്കുന്നത്​ ജീവിതത്തിലെ അസുലഭ നിമിഷമായിരിക്കുമെന്നും അതിനായി മത്സരത്തിലേക്ക്​ സ്വാഗതം ചെയ്യുന്നതായും എക്​സ്​പോ അധികൃ​തർ പറഞ്ഞു.