ദുബൈ ​പൊലീസിന്​ 100 വാഹനങ്ങൾ നൽകി വ്യവസായി

ദുബൈ: ദുബൈ ​പൊലീസിന്​ 100 വാഹനങ്ങൾ സമ്മാനിച്ച്​ വ്യവസായി. അൽ ഹബ്​തൂർ ഗ്രൂപ്പ്​ സ്ഥാപകനും ചെയർമാനുമായ ഖലഫ്​ അഹ്​മദ്​ അൽ ഹബ്​തൂരിയാണ്​ വാഹനങ്ങൾ സമ്മാനമായി നൽകിയത്​. ദുബൈയിലെ സുരക്ഷ വർധിപ്പിക്കാനുള്ള പൊലീസിന്‍റെ ശ്രമങ്ങൾക്ക്​ പിന്തുണ നൽകാൻ ലക്ഷ്യമിട്ടാണ്​ വാഹനങ്ങൾ നൽകിയത്​. മിത്​സുബിഷി പജേറോ എസ്​.യു.വികളാണ്​ നൽകിയത്​.

രാജ്യത്തെയും ജനങ്ങളെയും സേവിക്കാൻ സർക്കാരുമായി കൈകോർക്കുന്നത് സാമൂഹിക ഉത്തരവാദിത്തമാണെന്നും ദുബൈ നൽകുന്ന സുരക്ഷയിൽ അഭിമാനമുണ്ടെന്നും ഖലഫ്​ അൽ ഹബ്​തൂരി പറഞ്ഞു. രാജ്യത്തിന്‍റെ സുരക്ഷിതത്വബോധം വർധിപ്പിക്കുന്നതിന്​ ദുബൈ പൊലീസുമായി സഹകരിക്കുന്നതിൽ സന്തോഷമുണ്ടെന്നും അദ്ദേഹം കൂട്ടിചേർത്തു.

ഹബ്​തൂറിന്‍റെ പ്രവൃത്തി അഭിനന്ദനാർഹമാണെന്ന് ദുബൈ പൊലീസ്​ കമാൻഡർ ഇൻ ചീഫ്​​ ലഫ്​റ്റനന്‍റ്​ ജനറൽ അബ്​ദുല്ല ഖലീഫ അൽ മർറി പറഞ്ഞു. പൊലീസ് പ്രവർത്തനങ്ങൾ വർധിപ്പിക്കുന്നതിനും ലക്ഷ്യത്തെ പിന്തുണയ്ക്കുന്നതിനും ഈ വാഹനങ്ങൾ മുതൽക്കൂട്ടാകുമെന്നും അദ്ദേഹം പറഞ്ഞു. അസിസ്സ്റ്റന്‍റ്​ കമാൻഡർ ഇൻ ചീഫ്​ അബ്​ദുല്ല അലി അൽ ഗൈതിയും പ​ങ്കെടുത്തു.