ഫുജൈറയില്‍ കാള ഇടഞ്ഞു; കാര്‍ തകര്‍ത്തു

ഫുജൈറ: ഫുജൈറയില്‍ വാരാന്ത്യം നടന്നു വരുന്ന കാളപ്പോരിനിടയില്‍ ഇടഞ്ഞ കാള കാളപ്പോര് കാണാനത്തെിയയാളുടെ കാര്‍ തകര്‍ത്തു. സ്വദേശിയുടെ കാറിനാണ് കാളയുടെ ക്രോധത്തില്‍ കേടുപാടു സംഭവിച്ചത്. സംഭവ സമയം വാഹനത്തില്‍ ആളില്ലാതിരുന്നതിനാല്‍ അപകടം ഒഴിവായി. ആറു മാസത്തെ ഇടവേളക്ക് ശേഷം കഴിഞ്ഞ വാരമാണ് ഫുജൈറയില്‍ വീണ്ടും കാളപ്പോര് തുടങ്ങിയത്. വിവിധ എമിറേറ്റുകളില്‍ നിന്ന് നിരവധി പേരാണ് ഇന്നലെ കാളപ്പോര് കാണാനത്തെിയത്. 400^-500 കിലോ തൂക്കം വരുന്ന കാളകളാണ് ഇക്കുറിയും പോരിനായി ഇവിടെ ഒരുക്കിയിട്ടുള്ളത്. വെള്ളിയാഴ്ച്ചകളില്‍ വൈകുന്നേരം 4.30 മുതല്‍ ആറ് വരെയാണ് ഇവിടെ കാളപ്പോര് നടക്കുക.