ബിൻബാസ്​ ടാക്​സിയിൽ കയറി, സന്തോഷം സമ്മാനിച്ച്​ ഇറങ്ങി

അബൂദബി: കാണുന്ന മാത്രയിൽ തന്നെ ആരും ചിരിച്ചുപോകുന്ന മുഖമാണ്​ ഇമറാത്തി താരം ബിൻ ബാസി​​​െൻറത്​.  കിടിലൻ തമാശകളുമായാണ്​ അബ്​ദുൽ അസീസ്​ ബാസ്​ എന്ന ബിൻ ബാസ്​ സാമൂഹിക മാധ്യമങ്ങളിൽ താരമായതെങ്കിൽ കഴിഞ്ഞ ദിവസം അബൂദബിയിൽ ഇദ്ദേഹം പുഞ്ചിരി വിരിയിച്ചത്​ അപ്രതീക്ഷിത ടാക്​സി യാത്രയിലൂടെയാണ്​. 

ഇന്ത്യ, ബംഗ്ലാദേശ്​, പാക്കിസ്​ഥാൻ എന്നിവിടങ്ങളിൽ നിന്നുള്ള മൂന്ന്​ ഡ്രൈവർമാർക്കൊപ്പമാണ്​ താരം സഞ്ച രിച്ചത്​. ഏതു സമയവും കൈകാണിച്ച്​ ആരും ട്രിപ്പ്​ വിളിച്ച്​ കയറുമെന്നതിനാൽ കൂടെ സഞ്ചരിക്കുന്നയാൾ ആരാണെന്ന്​ ഡ്രൈവർമാർക്ക് ആദ്യം പിടികിട്ടിയില്ല. മലയാളിയായ ഡ്രൈവർ സജിയോട്​ ഇന്ത്യക്കാരനാണ്​ എന്നറിഞ്ഞപ്പോൾ കൈസാ ​േഹ എന്ന്​ ഹി ന്ദിയിൽ തിരക്കി. 

പിന്നെ മക്കൾ എത്ര പേരുണ്ടെന്നന്വേഷിച്ചു. രണ്ടു മക്കളെന്ന്​ മറുപടി. സജി നാട്ടിൽ പോയിട്ട്​ ഒര​ു വർഷമായെങ്കിൽ ബംഗ്ലാ സ്വദേശി വാജിദ്​ മക്കളെ കണ്ടിട്ട്​ രണ്ടു വർഷത്തിലേറെ ആയിട്ടുണ്ടായിരുന്നു. ഒരു സമ്മാനമുണ്ടെന്നു പറഞ്ഞ്​ നാട്ടിലേക്കും തിരിച്ചുമുള്ള ടിക്കറ്റ്​ കവറിലിട്ട്​​ നൽകിയപ്പോൾ സജിക്ക്​ ഒരു നിമിഷം വിശ്വസിക്കാനായില്ല. തുറന്നു നോക്കി സത്യമെന്ന്​ ഉറപ്പു വരുത്തി നന്ദിയും സന്തോഷവും അറിയിച്ചു. 

ഇതൊരു സ്വപ്​നം പോലെയെന്നാണ്​ വാജിദ്​ പ്രതികരിച്ചത്​. യു.എ.ഇ പ്രസിഡൻറ്​ ശൈഖ്​ ഖലീഫ ബിൻ സായിദ്​ ആൽനഹ്​യാൻ​ പ്രഖ്യാപിച്ച ദാനവർഷത്തി​െല റമദാ​ൻ പ്രമാണിച്ച്​ ഇത്തിഹാദ്​ എയർവേയ്​സ്​ ആണ്​ ടിക്കറ്റുകൾ സ്​പോൺസർ ചെയതത്​.