പ്രവാസികൾക്ക്​ തിരിച്ചടി; താമസിക്കുന്ന രാജ്യത്ത്​ നികുതി അടക്കാത്തവർ ഇന്ത്യയിലടക്കണം

ന്യൂഡൽഹി: വിദേശ രാജ്യങ്ങളിൽ താമസിക്കുന്ന ഇന്ത്യക്കാർ അതത്​ രാജ്യങ്ങളിൽ നികുതി അടക്കുന്നില്ലെങ്കിൽ ഇന്ത്യയ ിൽ വരുമാന നികുതി അടക്കേണ്ടി വരു​മെന്ന്​ ബജറ്റ്​ നിർദേശം.

നികുതി നിലവിലില്ലാത്ത യു.എ.ഇ അടക്കമുള്ള രാജ്യങ്ങള ിൽ ജോലി ചെയ്യുന്നവർക്ക്​ കനത്ത തിരിച്ചടിയാണ്​ ഈ നടപടി. ഇന്ത്യക്കാരായ ചിലർ ഒരു രാജ്യത്തും സ്​ഥിരമായി താമസിക് കുന്നി​​ല്ലെന്ന്​ കണ്ടെത്തിയിരുന്നു. ഇവർ ഒരു രാജ്യത്തും നികുതി അടക്കുന്നില്ല. ഇതു തടയാനാണ്​ പുതിയ നിർദേശം നടപ്പാക്കുന്നത്​. ഇതിൻെറ ഭാഗമായി നോൺ റെസിഡൻറ് ഇന്ത്യൻസ്​ (എൻ.ആർ.ഐ) പദവി കണക്കാക്കുന്നതിനുള്ള മാനദണ്ഡങ്ങളും മാറ്റും. എൻ.ആർ.ഐ ആയി കണക്കാക്കണമെങ്കിൽ ഇനി മുതൽ 240 ദിവസം ഇന്ത്യക്ക്​ പുറത്തു കഴിയണമെന്ന നിബന്ധനയാണ്​ ഏർപ്പെടുത്തുന്നത്​.

അതായത് പേഴ്​​സൻസ്​ ഓഫ്​ ഇന്ത്യൻ ഒറിജിൻ (പി.ഐ.ഒ) വിഭാഗത്തിൽ പെടുന്നവർ വർഷത്തിൽ 120 ദിവസം ഇന്ത്യയിൽ താമസിച്ചാൽ എൻ.ആർ.ഐ അല്ലാതായി മാറുന്ന തരത്തിൽ താമസ വ്യവസ്​ഥകളിൽ മാറ്റം വരുത്തും. നേരത്തേ ഇത്​ 182 ദിവസമായിരുന്നു. വർഷത്തിൽ നിശ്ചിത ദിവസം എന്ന കണക്കിൽ പല രാജ്യങ്ങളിലായി മാറിമാറി കഴിയുന്ന ഇന്ത്യക്കാർ ഉണ്ടെന്നും ഇവരെക്കൂടി ആദായ നികുതിയുടെ പരിധിയിൽ കൊണ്ടുവരുകയാണ്​ ലക്ഷ്യമെന്നും കേന്ദ്ര റവന്യൂ സെക്രട്ടറി അജയ്​ ഭൂഷൺ പാ​െണ്ഡ പറഞ്ഞു.

ഇതിനായി ആദായ നികുതി നിയമത്തിലെ ആറാം വകുപ്പ്​ ​ഭേദഗതി ചെയ്യും. നിലവിൽ എൻ.ആർ.ഐ പദവിയുള്ളവരിൽ പലരും ആറു മാസത്തോളം ഇന്ത്യയിൽനിന്ന്​ ബിസിനസ്​ ചെയ്​ത്​ വരുമാനമുണ്ടാക്കുമെങ്കിലും ഒരിടത്തും നികുതി നൽകാൻ ബാധ്യസ്​ഥരായിരുന്നില്ല. ഇൗ അവസ്​ഥക്കാണ്​ മാറ്റം വരുത്തുന്നതെന്ന്​ പാണ്ഡെ പറഞ്ഞു.

ആദായ നികുതി സംബന്ധിച്ച്​ നിലനിൽക്കുന്ന 100ലേറെ ആനുകൂല്യങ്ങൾ പുനഃപരിശോധിച്ച ശേഷം 70 ഇളവുകൾ എടുത്തുകളഞ്ഞെന്ന്​ ബജറ്റ്​ അവതരണത്തിൽ ധനമന്ത്രി നിർമല സീതാരാമൻ പറഞ്ഞിരുന്നു. ഇതിൻെറ ഭാഗമായാണ്​ എൻ.ആർ.ഐ പദവി സംബന്ധിച്ച മാനദണ്ഡങ്ങളിൽ മാറ്റം വരുത്താൻ തീരുമാനിച്ചത്​.